ലോകകപ്പ് ഫൈനൽ 2023: പണി തന്നത് രാഹുല്‍! ഇന്ത്യ 300നു മുകളില്‍ നേടിയേനെ: തുറന്നടിച്ച് ഗൗതം ഗംഭീര്‍

ഞായറാഴ്ച്ച ഫൈനലിൽ ഓസ്‌ട്രേലിയയോട് ആറ് വിക്കറ്റിന് തോറ്റതോടെ ഇന്ത്യയുടെ മൂന്നാം ലോകകപ്പ് കിരീട സ്വപ്‌നങ്ങളാണ് തകർന്നത്. ടൂർണമെന്റിലെ എല്ലാ മത്സരങ്ങളും ജയിച്ച് ഫൈനൽ കയറിയ ഇന്ത്യയ്ക്ക് പരാജയത്തിന്റെ രുചി നുകരേണ്ടി വന്നു. ഓസ്‌ട്രേലിയക്കെതിരായ ലോകകപ്പ് ഫൈനലില്‍ ഇന്ത്യയുടെ പരാജയത്തിനു പ്രധാന കാരണം മോശം ബാറ്റിങാണെന്നു ചൂണ്ടിക്കാണിച്ച് മുന്‍ ഓപ്പണര്‍ ഗൗതം ഗംഭീര്‍ രംഗത്ത്.

മധ്യ ഓവറുകളിലെ സ്ലോ ബാറ്റിങ് ഇന്ത്യക്കു കനത്ത തിരിച്ചടിയായി മാറിയെന്നും ആരെങ്കിലുമൊരാള്‍ കൂടുതല്‍ അഗ്രസീവായി ബാറ്റ് ചെയ്തിരുന്നെങ്കില്‍ മല്‍സരഫലം മറ്റൊന്നാവുമായിരുന്നെന്നും അദ്ദേഹം ചൂണ്ടിക്കാട്ടി. അഹമ്മദാബാദിലെ നരേന്ദ്ര മോദി സ്‌റ്റേഡിയത്തില്‍ ടോസിനു ശേഷം ബാറ്റിങിനു അയക്കപ്പെട്ട ഇന്ത്യക്കു 240 റണ്‍സ് മാത്രമേ നേടാനായിരുന്നുള്ളൂ. ഓസീസ് ഈ ലക്ഷ്യം അനായാസം മറികടക്കുകയും ചെയ്തു.

‘ഇതൊരു ഇരുതല മൂർച്ചയുള്ള വാളാണ്. പക്ഷെ ഞാൻ എപ്പോഴും പറയാറുണ്ട്, ഏറ്റവും ധൈര്യമുള്ള ടീം ലോകകപ്പ് നേടും. ഒരു കൂട്ടുകെട്ട് കെട്ടിപ്പടുക്കാൻ നിങ്ങൾക്ക് സമയം ആവശ്യമാണെന്ന് എനിക്ക് മനസ്സിലാക്കാൻ കഴിയും. എന്നാൽ 11 മുതൽ 40 ഓവർ വരെ വളരെ നീണ്ട സമയമാണ്. ആരെങ്കിലും ആ റിസ്ക് എടുക്കണമായിരുന്നു. ആക്രമണോത്സുകത നിലനിർത്തിയിരുന്നെങ്കിൽ ഇന്ത്യ മോശമല്ലാത്ത ഒരു സ്‌കോറിലേയ്‌ക്ക് എത്തുമായിരുന്നു. വേഗത്തിൽ സ്‌കോർ ചെയ്യാൻ ശ്രമിക്കേണ്ടതായിരുന്നു.

150ന് ഓൾഔട്ടായിരുന്നെങ്കിൽപ്പോലും, അവരുടെ മുൻനിര 6-7 ബാറ്റർമാർക്കൊപ്പം ഇന്ത്യ ശരിക്കും ആക്രമണോത്സുകമായി പോകുന്നത് ഞാൻ ശരിക്കും ഇഷ്ടപ്പെടുമായിരുന്നു. എന്നാൽ ഒരു ലോകകപ്പ് ഫൈനലിൽ നിങ്ങൾക്ക് 240 പ്രതിരോധിക്കാൻ കഴിയുമെന്ന് നിങ്ങൾക്ക് തോന്നുന്നുവെങ്കിൽ… നിങ്ങൾ പോരാടുന്നത് അവിടെയല്ല. ഒന്നുകിൽ നമ്മൾ 150 ഓൾ ഔട്ട്, അല്ലെങ്കിൽ 300. അവിടെയാണ് ഇന്ത്യയുടെ കുറവ് നാം കണ്ടത്. അവിടെയാണ് ഇന്ത്യ ഐസിസി ടൂർണമെന്റുകളിൽ വിജയിക്കാത്തത്. ഞാൻ പുറത്തായാലും ഞങ്ങൾ ആക്രമണോത്സുകത കാണിക്കണം എന്ന സന്ദേശം രോഹിത് കളിക്കുന്നതിന് മുമ്പ് നൽകണമായിരുന്നു’, അദ്ദേഹം പറഞ്ഞു.

കെ എൽ രാഹുലും വിരാട് കോഹ്‌ലിയും നാലാം വിക്കറ്റിൽ 109 പന്തുകൾ കളിച്ചെങ്കിലും 67 റൺസ് മാത്രമാണ് നേടിയത്. ബൗണ്ടറികൾ ഇല്ലാതിരുന്നിട്ടും 63 പന്തിൽ 54 റൺസ് നേടിയ കോഹ്‌ലി മികച്ച സ്‌ട്രൈക്ക് റേറ്റ് നിലനിർത്തി. അതിനു ശേഷം മികച്ച സ്‌കോർ ചെയ്യുക എന്നത് ഇന്ത്യയ്ക്ക് ബുദ്ധിമുട്ടായി. ഇന്നിംഗ്‌സ് നങ്കൂരമിടാനുള്ള ചുമതല കോഹ്‌ലിക്ക് ലഭിച്ചിട്ടുണ്ടെന്നും ടൂർണമെന്റിലുടനീളം അത് മികച്ചതാണെന്നും ഗംഭീർ പറഞ്ഞു. അതിനാൽ, മറ്റ് ബാറ്റർമാർ ആക്രമണാത്മകമായി കളിക്കാൻ ശ്രമിക്കേണ്ടതായിരുന്നു. പകരം 107 പന്തിൽ 66 റൺസ് മാത്രമാണ് രാഹുൽ നേടിയത്. ഇന്ത്യൻ ടീമിലുള്ളവർക്ക് ധൈര്യമുണ്ടായിരുന്നില്ലെന്ന് അദ്ദേഹം പരിഹസിച്ചു. കെ.എൽ രാഹുൽ ആക്രമിച്ച് കളിക്കണമായിരുന്നു എന്നാണ് ഗംഭീർ പറയുന്നത്.