രാമേശ്വരം കഫേ ബോംഫ് സ്ഫോടനം: മുസാഫിർ ഷാസിബിനെയും അബ്ദുൾ താഹയെയും പിടികൂടി എൻ.ഐ.എ

ബെംഗളൂരു: രാമേശ്വരം കഫേ സ്ഫോടന കേസിലെ മുഖ്യപ്രതികളെ പിടികൂടി. ബംഗാളില്‍ നിന്നാണ് എന്‍.ഐ.എ പ്രതികളെ പിടികൂടിയത്. കേസിലെ മുഖ്യപ്രതി മുസ്സാവിർ ഹുസൈൻ ഷാസിബ്, കൂട്ടുപ്രതി അബ്ദുൾ മത്തീൻ താഹ എന്നിവരാണ് പിടിയിലായത്. കർണാടകയിലെ ശിവമോഗ ജില്ലയിലെ തീർഥഹള്ളി സ്വദേശികളായ ഷാസിബും താഹയും കൊൽക്കത്തയ്ക്ക് സമീപം ഒളിച്ചിരിക്കുന്നതായി ദേശീയ അന്വേഷണ ഏജന്‍സി കണ്ടെത്തിയിരുന്നു.

സ്ഫോടനത്തിന് ശേഷം ആരാധനാലയത്തിൽ ഉപേക്ഷിച്ച നിലയില്‍ കണ്ടെത്തിയ ബേസ്ബോൾ തൊപ്പിയിൽ നിന്ന് ലഭിച്ച ഡിഎൻഎ സാമ്പിളുകൾ പ്രതികളെ കണ്ടെത്തുന്നതില്‍ നിര്‍ണായകമായി. അറസ്റ്റിലായ പ്രതികളുടെ ഐഡൻ്റിറ്റി സ്ഥിരീകരിക്കാൻ എൻഐഎ ഡിഎൻഎ സാമ്പിളുകൾ ഉപയോഗിക്കാനാണ് സാധ്യത. ഒളിവിൽപ്പോയ പ്രതികള്‍ കൊൽക്കത്തയ്ക്ക് സമീപം വ്യാജ പേരുകളില്‍ ഒളിപ്പിച്ച് കഴിയുകയായിരുന്നു.

കേന്ദ്ര രഹസ്യാന്വേഷണ ഏജൻസികളും പശ്ചിമ ബംഗാൾ, തെലങ്കാന, കർണാടക, കേരളം എന്നിവിടങ്ങളിൽ നിന്നുള്ള പോലീസുകാരും തമ്മിലുള്ള ഏകോപിത നടപടിയിലാണ് പ്രതികളെ പിടികൂടിയത്. കർണാടകയിലെ 12, തമിഴ്‌നാട്ടിലെ 5, ഉത്തർപ്രദേശിലെ 1 ഉൾപ്പെടെ മൂന്ന് സംസ്ഥാനങ്ങളിലായി 18 ഇടങ്ങളില്‍ നടത്തിയ റെയ്ഡിനെ തുടർന്ന് ചില പ്രതികളെ പിടികൂടിയതായി എൻഐഎ വക്താവ് നേരത്തെ പറഞ്ഞിരുന്നു. സ്‌ഫോടനം നടത്തിയ വ്യക്തിക്ക് അദ്ദേഹം ലോജിസ്റ്റിക് പിന്തുണ നല്‍കിയ ചിക്കമംഗളൂരു ഖൽസയിൽ താമസിക്കുന്ന മുസമ്മിൽ ഷെരീഫിനെയും അറസ്റ്റ് ചെയ്തിരുന്നു.