പാകിസ്ഥാനിൽ നിന്നുള്ള എല്ലാ മെയിൽ, പാഴ്‌സൽ സർവീസുകളുടെയും കൈമാറ്റം നിർത്തിവച്ച് ഇന്ത്യ

ന്യൂദൽഹി : പാകിസ്ഥാനിൽ നിന്ന് വ്യോമ, ഉപരിതല റൂട്ടുകളിലൂടെയുള്ള എല്ലാ വിഭാഗങ്ങളിലുമുള്ള മെയിലുകളുടെയും പാഴ്‌സലുകളുടെയും കൈമാറ്റം താൽക്കാലികമായി നിർത്തിവയ്ക്കാൻ കേന്ദ്ര സർക്കാർ തീരുമാനിച്ചതായി ശനിയാഴ്ച വാർത്താവിനിമയ മന്ത്രാലയം അറിയിച്ചു. ഏപ്രിൽ 22 ന് ജമ്മു കശ്മീരിലെ പഹൽഗാം ജില്ലയിൽ 26 സാധാരണക്കാരുടെ മരണത്തിനിടയാക്കിയ ഭീകരാക്രമണത്തിന്റെ പശ്ചാത്തലത്തിലാണ് ഈ തീരുമാനം.

സിന്ധു ജല ഉടമ്പടി നിർത്തലാക്കുക, പാകിസ്ഥാൻ പൗരന്മാർക്ക് നൽകിയ എല്ലാ പ്രത്യേക വിസകളും റദ്ദാക്കുക, പാകിസ്ഥാൻ വിമാനക്കമ്പനികൾക്കുള്ള വ്യോമാതിർത്തി അടച്ചിടുക, അമൃത്സറിലെ അട്ടാരി-വാഗ അതിർത്തി അടയ്ക്കുക എന്നിവയുൾപ്പെടെ പാകിസ്ഥാനെതിരെ സർക്കാർ നിരവധി നടപടികൾ സ്വീകരിച്ചിട്ടുണ്ട്.

പഹൽഗാം ഭീകരാക്രമണത്തിന് ഒരു ദിവസത്തിന് ശേഷം, ഏപ്രിൽ 23 ന്, ഇന്ത്യയിലെ പാകിസ്ഥാന്റെ ഉന്നത സൈനിക അറ്റാഷെമാരെ സർക്കാർ പേഴ്‌സണൽ നോൺ ഗ്രാറ്റയായി പ്രഖ്യാപിക്കുകയും രാജ്യം വിടാൻ നിർദ്ദേശിക്കുകയും ചെയ്തു. കൂടാതെ ഇന്ത്യ പാകിസ്ഥാനിൽ നിന്ന് സ്വന്തം സൈനിക അറ്റാഷെമാരെ പിൻവലിക്കുകയും ഇസ്ലാമാബാദിലെ ഹൈക്കമ്മീഷനിലെ ജീവനക്കാരുടെ എണ്ണം കുറയ്ക്കുകയും ചെയ്തു.

ദേശീയ സുരക്ഷയുടെയും പൊതുനയത്തിന്റെയും താൽപ്പര്യങ്ങൾ കണക്കിലെടുത്ത് പാകിസ്ഥാനിൽ നിന്ന് എല്ലാ സാധനങ്ങളുടെയും നേരിട്ടോ അല്ലാതെയോ ഇറക്കുമതി ഇന്ത്യ നിരോധിച്ചതായി സർക്കാർ ഉത്തരവിൽ പറയുന്നു. ഈ തീരുമാനം പാകിസ്ഥാനിൽ നിന്ന് ഇന്ത്യയിലേക്കുള്ള എല്ലാ സാധനങ്ങളുടെയും കയറ്റുമതി പൂർണ്ണമായും നിർത്തലാക്കും.

2024-25 ഏപ്രിൽ-ജനുവരി മാസങ്ങളിൽ പാകിസ്ഥാനിലേക്കുള്ള ഇന്ത്യയുടെ കയറ്റുമതി 447.65 മില്യൺ ഡോളറായിരുന്നു. അതേസമയം ഇറക്കുമതി 0.42 മില്യൺ ഡോളർ മാത്രമായിരുന്നുവെന്ന് പിടിഐ റിപ്പോർട്ട് പറയുന്നു. മെയ് 2 ന് പുറത്തിറക്കിയ ഡയറക്ടറേറ്റ് ജനറൽ ഓഫ് ഫോറിൻ ട്രേഡ് വിജ്ഞാപനത്തിൽ 2023 ലെ വിദേശ വ്യാപാര നയത്തിൽ ഇതുസംബന്ധിച്ച ഒരു വ്യവസ്ഥ ചേർത്തിട്ടുണ്ടെന്ന് അറിയിച്ചു. ഇനിയൊരു ഉത്തരവ് ഉണ്ടാകുന്നതുവരെ പാകിസ്ഥാനിൽ നിന്ന് ഉൽപാദിപ്പിക്കുന്നതോ കയറ്റുമതി ചെയ്യുന്നതോ ആയ എല്ലാ വസ്തുക്കളുടെയും നേരിട്ടോ അല്ലാതെയോയുള്ള ഇറക്കുമതി നിരോധിച്ചിട്ടുണ്ട്. ദേശീയ സുരക്ഷയുടെയും പൊതുനയത്തിന്റെയും താൽപ്പര്യങ്ങൾക്കായി ഈ നിയന്ത്രണം ഏർപ്പെടുത്തിയിട്ടുണ്ടെന്നും അതിൽ കൂട്ടിച്ചേർത്തു.

“സൈബർ ഗ്രൂപ്പ് HOAX1337”, “നാഷണൽ സൈബർ ക്രൂ” തുടങ്ങിയ പാകിസ്ഥാൻ ആസ്ഥാനമായുള്ള ഹാക്കിംഗ് ഗ്രൂപ്പുകൾ നഗ്രോട്ടയിലെയും സുൻജുവാനിലെയും ആർമി പബ്ലിക് സ്കൂളിന്റെ വെബ്‌സൈറ്റുകളെ ലക്ഷ്യം വച്ചതിന് ഒരു ദിവസത്തിന് ശേഷമാണ് ഇസ്ലാമാബാദിൽ നിന്നുള്ള മെയിൽ എക്സ്ചേഞ്ച് താൽക്കാലികമായി നിർത്തിവയ്ക്കാനുള്ള തീരുമാനം. പഹൽഗാം ഭീകരാക്രമണത്തിലെ ഇരകളെ പരിഹസിക്കുന്ന സന്ദേശങ്ങൾ ഉപയോഗിച്ച് ഹാക്കർമാർ അവ വികൃതമാക്കാൻ ശ്രമിച്ചു. വിമുക്തഭടന്മാരുടെ ആരോഗ്യ സംരക്ഷണ സേവനങ്ങൾക്കായി പ്രവർത്തിക്കുന്ന ഒരു വെബ്‌സൈറ്റ് ഈ ഹാക്കിങ് സംഘം വികൃതമാക്കിയിരുന്നു.

ഏപ്രിൽ 29 ന് “IOK ഹാക്കർ” ഖിലാഫത്തിന്റെ ഇന്റർനെറ്റ് എന്ന പേരിൽ പ്രവർത്തിക്കുന്ന ഈ സംഘം ഇന്ത്യൻ സർക്കാരിൻ്റെ വെബ് പേജുകൾ വികൃതമാക്കാനും ഓൺലൈൻ സേവനങ്ങൾ തടസ്സപ്പെടുത്താനും വ്യക്തിഗത വിവരങ്ങൾ ചോർത്താനും ശ്രമിച്ചുവെന്ന് കേന്ദ്രസർക്കാരിൻ്റെ റിപ്പോർട്ടിൽ പറയുന്നു.