‘ പഹൽഗാം ആക്രമണത്തിന് പ്രതികാരം ചെയ്ത പ്രധാനമന്ത്രിക്ക് അഭിനന്ദനങ്ങൾ’ : കേന്ദ്ര സർക്കാരിനെ പ്രശംസിച്ച്  രജനീകാന്ത് 

ചെന്നൈ : പഹൽഗാം ഭീകരാക്രമണത്തിന് പ്രതികാരം ചെയ്യാൻ ഓപ്പറേഷൻ സിന്ദൂർ ആരംഭിച്ചതിന് പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ, പ്രതിരോധ മന്ത്രി രാജ്‌നാഥ് സിംഗ് എന്നിവരെ നടൻ രജനീകാന്ത് അഭിനന്ദിച്ചു. രാജ്യത്തെ സംരക്ഷിക്കുന്നതിൽ ഇന്ത്യൻ സായുധ സേനകൾ കാണിക്കുന്ന പരിശ്രമങ്ങളെയും സ്ഥിരോത്സാഹത്തെയും അദ്ദേഹം പ്രശംസിച്ചു.

തലൈവ എന്ന് സ്നേഹത്തോടെ വിളിക്കപ്പെടുന്ന രജനീകാന്ത്, ജയിലർ 2 ന്റെ ഷൂട്ടിംഗിന് പുറപ്പെടുന്നതിന് മുമ്പ് ഞായറാഴ്ച ചെന്നൈ അന്താരാഷ്ട്ര വിമാനത്താവളത്തിൽ മാധ്യമങ്ങളോട് സംസാരിക്കവെയാണ് രാഷ്ട്ര നേതാക്കളെ പ്രശംസിച്ചത്. അടുത്തിടെ സോഷ്യൽ മീഡിയയിൽ ഓപ്പറേഷൻ സിന്ദൂരിനെക്കുറിച്ച് തന്റെ അഭിപ്രായം പ്രകടിപ്പിച്ച രജനീകാന്ത് ആദ്യമായി നേരിട്ട് ഇതിനെക്കുറിച്ച് ഇന്നാണ് സംസാരിച്ചത്.

‘പാകിസ്ഥാനിലെ തീവ്രവാദ ഒളിത്താവളങ്ങൾ ആക്രമിച്ചതിന് ഇന്ത്യൻ സായുധ സേനയ്ക്ക് എന്റെ ഹൃദയംഗമമായ അഭിനന്ദനങ്ങൾ. ഈ യുദ്ധം കാര്യക്ഷമതയോടെയും ദൃഢനിശ്ചയത്തോടെയും അഭിനിവേശത്തോടെയും കൈകാര്യം ചെയ്തതിന് പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ, പ്രതിരോധ മന്ത്രി രാജ്‌നാഥ് സിംഗ്, നമ്മുടെ ട്രൈഫോഴ്‌സ് ഉദ്യോഗസ്ഥർ, സൈനികർ എന്നിവരെ ഞാൻ അഭിനന്ദിക്കുന്നു. ‘- ചെന്നൈ അന്താരാഷ്ട്ര വിമാനത്താവളത്തിൽ സംസാരിച്ച മുതിർന്ന നടൻ പറഞ്ഞു.

അതേ സമയം മെഗാസ്റ്റാർ അടുത്തതായി ലോകേഷ് കനകരാജിനൊപ്പം കൂലിയിലാണ് അഭിനയിക്കുന്നത്. ഈ വർഷം ഓഗസ്റ്റ് 14 ന് ചിത്രം റിലീസ് ചെയ്യാനാണ് പദ്ധതിയിട്ടിരിക്കുന്നത്. 2024 ൽ പുറത്തിറങ്ങിയ ‘വേട്ടയാൻ’ എന്ന ചിത്രത്തിന് ശേഷം നടന്റെ അടുത്ത ചിത്രമാണിത്. ഇതിനുപുറമെ, നിലവിൽ ഷൂട്ടിംഗ് പുരോഗമിക്കുന്ന ജയിലർ 2 അദ്ദേഹത്തിൻ്റെ മറ്റൊരു ചിത്രമാണ്.