ജൂൺ മുതൽ അടിമുടി മാറ്റത്തിനൊരുങ്ങി സാമ്പത്തിക മേഖല : എൽപിജി മുതൽ എടിഎം വരെ നിയമങ്ങൾ വ്യത്യസ്തമാകും

ന്യൂഡൽഹി : എല്ലാ മാസവും ആദ്യ തീയതി ചില മാറ്റങ്ങളുണ്ട്. വരാനിരിക്കുന്ന ജൂൺ 1 മുതൽ സംഭവിക്കാവുന്ന മാറ്റങ്ങൾ സാധാരണക്കാരുടെ ജീവിത സാഹചര്യങ്ങളെയും സാമ്പത്തിക അന്തരീക്ഷത്തെയും സാരമായി ബാധിച്ചേക്കാം. ജൂണിൽ എന്തൊക്കെ മാറ്റങ്ങൾ സംഭവിക്കുമെന്ന് നമുക്ക് നോക്കാം

ഇപിഎഫ്ഒ

ഇപിഎഫ്ഒ ജീവനക്കാർക്ക് ജൂണിൽ വലിയ ആശ്വാസം ലഭിച്ചേക്കാം. പിഎഫ് പിൻവലിക്കൽ, ഡാറ്റ അപ്‌ഡേറ്റ്, ക്ലെയിം തുടങ്ങിയവ എളുപ്പമാക്കുന്ന ഇപിഎഫ്ഒ 3.0 യുടെ പുതിയ പതിപ്പ് സർക്കാർ പുറത്തിറക്കാൻ പോകുന്നു. ഇതിന് കീഴിൽ, എടിഎമ്മിൽ കാർഡ് ഉപയോഗിച്ച് പിൻവലിക്കുന്ന അതേ രീതിയിൽ കാർഡ് ഉപയോഗിച്ച് പണം പിൻവലിക്കാം.

ക്രെഡിറ്റ് കാർഡ്

ക്രെഡിറ്റ് കാർഡ് ഉപഭോക്താക്കളെ ബാധിക്കുന്ന നിരവധി മാറ്റങ്ങൾ ജൂൺ 1 മുതൽ പ്രാബല്യത്തിൽ വന്നേക്കാം. ഓട്ടോ-ഡെബിറ്റ് ചെയ്തില്ലെങ്കിൽ, രണ്ട് ശതമാനം പിഴ ചുമത്തിയേക്കാം. യൂട്ടിലിറ്റി ബില്ലുകൾക്കും ഇന്ധനച്ചെലവുകൾക്കും അധിക ചാർജുകൾ ഈടാക്കും, അന്താരാഷ്ട്ര ഇടപാടുകൾക്ക് അധിക ചാർജുകൾ ഈടാക്കും. റിവാർഡ് പോയിന്റ് സംവിധാനത്തിലും മാറ്റം വന്നേക്കാം.

എടിഎമ്മുകൾ

അടുത്ത മാസത്തോടെ എടിഎമ്മുകൾ വഴിയുള്ള പണമിടപാടുകളിലും മാറ്റങ്ങൾ ഉണ്ടായേക്കാം. പണം പിൻവലിക്കുന്നതിന് ഏർപ്പെടുത്തിയിരിക്കുന്ന നിരക്ക് വർദ്ധിക്കും. സൗജന്യ പരിധിക്ക് പുറത്തുള്ള ഇടപാടുകൾക്ക് നിരക്ക് വർദ്ധനവ് ബാധകമാകും. മെയ് മാസത്തിൽ, എടിഎം കൗണ്ടറുകൾ വഴി പണം പിൻവലിക്കുന്നതിനുള്ള നിരക്കുകൾ വർദ്ധിപ്പിച്ചു. നിരക്ക് 21 രൂപയിൽ നിന്ന് 23 രൂപയായി ഉയർത്തി.

എൽപിജി സിലിണ്ടർ

എല്ലാ മാസവും ആദ്യ ദിവസം എൽപിജി സിലിണ്ടറിന്റെ വിലയിൽ മാറ്റം വരാറുണ്ട്. പാചകവാതക ഗ്യാസിലുണ്ടാകുന്ന വിലയിലെ മാറ്റങ്ങൾ സാധാരണ കുടുംബങ്ങൾക്ക് ഏറെ പ്രാധാന്യമുള്ളതാണ്. ജൂൺ ഒന്നു മുതൽ ഗ്യാസിന്റെ വില കൂടാനും കുറയാനും സാധ്യതയുണ്ട്. സാധാരണക്കാരന്റെ സാമ്പത്തിക ഭദ്രതയെ ബാധിക്കുന്ന ഈ മാറ്റം ഏറെ പ്രാധാന്യമുള്ളതാണ്.

ഫിക്സ്ഡ് ഡെപോസിറ്റിന്റെ പലിശ നിരക്ക്

ഫിക്സ്ഡ് ഡെപോസിറ്റിന്റെ പലിശ നിരക്കിലും അടുത്ത മാസം ആദ്യത്തിൽ മാറ്റമുണ്ടായേക്കും. 6.5 മുതൽ 7.5 ശതമാനം വരെയാണ് നിലവിൽ മിക്ക ബാങ്കുകളും നൽകുന്ന പലിശ നിരക്ക്. ഇത് കുറയാൻ സാധ്യതയുണ്ടെന്നാണ് അനുമാനങ്ങൾ.