തിരുവനന്തപുരം: മുന്‍ മുഖ്യമന്ത്രി ഉമ്മന്‍ചാണ്ടി അടക്കമുള്ള കോണ്‍ഗ്രസ് നേതാക്കള്‍ക്കെതിരെ സോളാര്‍ കമ്മീഷന്‍ റിപ്പോര്‍ട്ടിന്‍മേല്‍ ലൈംഗിക പീഡന കേസുകള്‍ നിലനില്‍ക്കില്ലെന്ന് സര്‍ക്കാറിന് നിയമോപദേശം. ഇതുസംബന്ധിച്ച നിയമോപദേശം നല്‍കിയത് സുപ്രീംകോടതി മുന്‍ ജസ്റ്റിസ് അരിജിത് പസായത്താണ്.
ശിവരാജന്‍ റിപ്പോര്‍ട്ടിൽ അഴിമതിക്കേസില്‍ തെളിയിക്കാവുന്ന വസ്തുതകളുണ്ട്. എന്നാല്‍ നേതാക്കാള്‍ പീഡിപ്പിച്ചെന്ന സരിത എസ് നായരുടെ പരാതികളില്‍ കേസെടുക്കാന്‍ കഴിയില്ല. പീഡിപ്പിക്കപ്പെട്ടുവെന്നും ലൈംഗിക സംതൃപ്തി അഴിമതിയായി കണക്കാക്കാമെന്ന് റിപ്പോര്‍ട്ടില്‍ പറയുമ്പോഴും അതില്‍ വൈരുദ്ധ്യം നിലനില്‍ക്കുന്നുണ്ട്. പരസ്പര സമ്മതത്തോടെയുള്ള ലൈംഗിക ബന്ധമാണ് നടന്നതെന്നുള്ള വാഖ്യാനവും വരാം. ഇത് എഫ്.ഐ.ആര്‍ റദ്ദാക്കാനുള്ള സാഹചര്യം ഉണ്ടാക്കുമെന്നും ജസ്റ്റിസ് അരിജിത് പസായത്ത് നല്‍കിയ നിയമോപദേശത്തില്‍ പറയുന്നു.
കരുതലോടെ വേണം പ്രമുഖര്‍ ഉള്‍പ്പെട്ട കേസായതിനാല്‍ സ്ത്രീപീഡനത്തില്‍ കേസെടുക്കാന്‍. അഴിമതിക്ക് റിപ്പോര്‍ട്ടിന്റെ അടിസ്ഥാനത്തില്‍ കേസ് രജിസ്റ്റര്‍ ചെയ്യാം. ഈ സാഹചര്യത്തില്‍ തുടരന്വേഷണം നടത്തിയ ശേഷം കേസെടുക്കാമെന്നും നിയമോപദേശമുണ്ട്.
Post Your Comments