മുംബൈ: നോ പാര്‍ക്കിംഗ് ഏരിയയില്‍ കാര്‍ പാര്‍ക്ക് ചെയ്ത് കുഞ്ഞിനെ മുലയൂട്ടുകയായിരുന്ന യുവതിയെ അടക്കം കാര്‍ കെട്ടിവലിച്ചുകൊണ്ടുപോയ സംഭവത്തില്‍ പൊലീസുകാരനെ സസ്പെൻഡ് ചെയ്‌തു. ട്രാഫിക്ക് പൊലീസ് കോണ്‍സ്റ്റബിള്‍ ശശാങ്ക് റാണയെയാണ് സസ്പെൻഡ് ചെയ്‌തത്‌. വെള്ളിയാഴ്ച മുംബൈയിലെ മലാഡിലുള്ള എസ് വി റോഡിലായിരുന്നു സംഭവം നടന്നത്. പാര്‍ക്ക് ചെയ്ത കാറിന്റെ പിന്‍സീറ്റിലിരുന്ന് ഏഴുമാസം പ്രായമായ കുഞ്ഞിനെ മുലയൂട്ടുകയായിരുന്നു യുവതി. നോ പാർക്കിങ് പ്രദേശമാണെന്ന് ചൂണ്ടിക്കാട്ടി മുംബൈ ട്രാഫിക് പൊലീസ്, കാർ കെട്ടിവലിച്ചു കൊണ്ടു പോകുകയായിരുന്നു.
തന്റെ ആരോഗ്യസ്ഥിതി മോശമാണെന്നു കാണിക്കുന്ന മെഡിക്കല്‍ രേഖകള്‍ യുവതി പൊലീസിനെ കാണിച്ചെങ്കിലും ഇത് പരിശോധിക്കാന്‍ പോലീസ് തയ്യാറായില്ല. തുടർന്ന് സംഭവത്തിന് ദൃക്‌സാക്ഷികളായവര്‍ ദൃശ്യം പകര്‍ത്തി സോഷ്യല്‍ മീഡിയയില്‍ പോസ്റ്റ് ചെയ്യുകയായിരുന്നു. സംഭവത്തില്‍ മുംബൈ ജോയിന്റ് പൊലീസ് കമ്മിഷണര്‍ അന്വേഷണം പ്രഖ്യാപിച്ചു.
Post Your Comments