ചണ്ഡിഗഢ്: രാത്രി കാമുകിയെ കാണാന്‍ വീട്ടില്‍ എത്തിയ യുവാവിനെ പെണ്‍കുട്ടിയുടെ വീട്ടുകാര്‍ അടിച്ചുകൊലപ്പെടുത്തി. ഹരിയാനയിലെ ജഹാജര്‍ ജില്ലയിലാണ് ദാരുണമായ സംഭവം നടന്നത്. കൃഷിക്ക് വെള്ളം നനയ്ക്കാന്‍ എന്നു പറഞ്ഞാണ് സുമിത് എന്ന യുവാവ് വീട്ടില്‍ നിന്നും ഇറങ്ങിയത്. എന്നാല്‍ ആരും കാണാതെ പെണ്‍കുട്ടിയുടെ വീട്ടില്‍ എത്തിയ സുമിതിനെ വീട്ടുകാര്‍ കാണുകയും മര്‍ദ്ദിച്ച്‌ കൊലപ്പെടുത്തുകയുമായിരുന്നു. പെണ്‍കുട്ടിയുടെ വീട്ടില്‍ നിന്നും സുമിത് നിലവിളിക്കുന്ന ശബ്ദം കേട്ട് അയല്‍ക്കാരാണ് പൊലീസിനെ വിവരം അറിയിച്ചത്. സംഭവം അറിഞ്ഞ് പൊലീസ് സ്ഥലത്ത് എത്തുമ്പോഴേക്കും സുമിത് മരിച്ചിരുന്നു.
പെണ്‍കുട്ടിയുടെ പിതാവ് സജ്ജയ് സിംഗ് ദില്ലി പൊലീസില്‍ നിന്നും റിട്ടയര്‍ ചെയ്ത ഉദ്യോഗസ്ഥനാണ്. സുമിതിന്റെ വീട്ടുകാരുടെ പരാതിയില്‍ പെണ്‍കുട്ടിയുടെ അച്ഛന്‍, അമ്മ, അമ്മാവന്‍ എന്നിവരെ പൊലീസ് അറസ്റ്റ് ചെയ്തു. അറസ്റ്റ് ചെയ്ത പ്രതികള്‍ കുറ്റം സമ്മതിച്ചതായി പൊലീസ് പറഞ്ഞു. മകളെ രാത്രി കാണാന്‍ എത്തിയ ദേഷ്യത്തിലാണ് സുമിതിനെ മര്‍ദ്ദിച്ചതെന്ന് സജ്ജയ് പറഞ്ഞു. സുമിതിനെ കൊല്ലാന്‍ ഉദ്ദേശിച്ചിരുന്നില്ലെന്നും എന്നാല്‍ മര്‍ദ്ദനത്തില്‍ ഉണ്ടായ മുറിവ് കാരണമാണ് സുമിത് മരിച്ചതെന്നും സജ്ജയി പൊലീസില്‍ മൊഴി നല്‍കി.
Post Your Comments