മലയാള സിനിമയിലെ മികച്ച കുറ്റാന്വേഷണ പരമ്പര ഏതാണെന്ന് ചോദിച്ചാല്‍ ഏതൊരു മലയാളിയും നിസ്സംശയം പറയുന്ന പേര്, സേതുരാമയ്യര്‍ സിബി ഐ ഇറങ്ങിയിട്ട് മൂന്ന് പതിറ്റാണ്ട് തികഞ്ഞിരിക്കുകയാണ്. 1988ലാണ് ഈ സീരീസിലെ ആദ്യ സിനിമയായ ഒരു സിബി ഐ ഡയറിക്കുറിപ്പ് പുറത്തിറങ്ങിയത്. നാല് ഭാഗങ്ങളിലായാണ് സേതുരാമയ്യര്‍ എത്തിയത്. അഞ്ചാം ഭാഗത്തിനായി ആരാധകര്‍ ഇന്നും അക്ഷമയോടെ കാത്തിരിക്കുകയാണ്. അഞ്ചാം ഭാഗം പുറത്തിറങ്ങുമെന്ന് അണിയറപ്രവര്‍ത്തകര്‍ അറിയിച്ചിരുന്നു. ഇതോടെയാണ് അത്തരത്തിലുള്ള ചര്‍ച്ചകള്‍ വീണ്ടും സജീവമായിത്തുടങ്ങിയത്. എന്നായിരിക്കും അത് സംഭവിക്കുന്നതെന്നറിയാനായി കാത്തിരിക്കുകയാണ് ആരാധകര്‍. അതിനിടയിലാണ് സിനിമ യാഥാര്‍ത്ഥ്യമാവുന്നതിനുള്ള നീക്കങ്ങളും സജീവമായി നടക്കുന്നത്.
മമ്മൂട്ടിയുടെ കരിയറിലെ തന്നെ മികച്ച കഥാപാത്രങ്ങളിലൊന്നാണ് സേതുരാമയ്യര്‍. വിവിധ കേസുകളെക്കുറിച്ച് അന്വേഷിക്കാനെത്തിയ സേതുരാമയ്യരെ മലയാളികള്‍ ഇരുകൈയ്യും നീട്ടി സ്വീകരിക്കുകയായിരുന്നു. കെ മധു എസ് എന്‍ സ്വാമി കൂട്ടുകെട്ടിലാണ് ഈ ചിത്രങ്ങള്‍ പുറത്തിറങ്ങിയത്. സേതുരാമയ്യരുടെ മാനറിസം പോലും മലയാളികള്‍ക്ക് സുപരിചിതമാണ്. അലി ഇമ്രാനെ സേതുരാമയ്യരാക്കിയതും ആ മാനറിസങ്ങള്‍ സ്വീകരിച്ചതിന് പിന്നിലും മമ്മൂട്ടിയായിരുന്നു. സിനിമയ്ക്ക് പിന്നിലെ കാര്യങ്ങളെക്കുറിച്ചെല്ലാം ആരാധകര്‍ക്ക് അറിയാവുന്നതാണ്. ഓണത്തിന് തിയേറ്ററുകളിലേക്കെത്തുന്ന തരത്തില്‍ സിനിമയൊരുക്കാനുള്ള നീക്കങ്ങളാണ് അണിയറയില്‍ നടക്കുന്നതെന്നുള്ള വിവരമാണ് ഇപ്പോള്‍ പുറത്തുവന്നിട്ടുള്ളത്.
Post Your Comments