നമ്മൾ ഇന്ത്യാക്കാരാണെന്ന ഏകതാബോധം സ്‌കൂൾതലം മുതൽ ഉണ്ടാകണമെന്ന് ഗവർണർ പി. സദാശിവം അഭിപ്രായപ്പെട്ടു. ഇന്ത്യൻ കൗൺസിൽ ഫോർ ചൈൽഡ് വെൽഫയറിന്റെ ആഭിമുഖ്യത്തിൽ സംസ്ഥാന ശിശുക്ഷേമ സമിതിയുടെ സഹകരണത്തോടെ സംഘടിപ്പിച്ച കുട്ടികളുടെ 37ാമത് ദേശീയതല സഹവാസ ക്യാമ്പ് ഉദ്ഘാടനം ചെയ്യുകയായിരുന്നു അദ്ദേഹം. സമൂഹത്തിലെ അംഗമെന്ന നിലയിലെ കടമകൾ ഓർമിപ്പിക്കാൻ ഇതുപോലുള്ള സഹവാസ ക്യാമ്പുകൾക്കാകണം. കുട്ടികളുടെ അവകാശങ്ങളും കടമകളും അതിന്റെ നിയമവശങ്ങളും മനസിലാക്കണം. മികച്ച ഒരു പഠനാവസരമായി ഇത്തരം ക്യാമ്പുകളെ മാറ്റാൻ വിദ്യാർഥികൾക്കാകണം. പരിപാടിയിലെ ഇടപെടലുകൾ വിവിധ സംസ്ഥാനങ്ങളിലെ സാംസ്‌കാരികമായ പൈതൃകം മനസിലാക്കാനും ഇന്ത്യ ഒരു രാജ്യമെന്ന നിലയിൽ വിശാലമായ കാഴ്ചപ്പാടുണ്ടാക്കാനും കഴിയണം. മാർക്കുകിട്ടാൻ വേണ്ടിയുള്ള അനാരോഗ്യകരമായ മത്സരം, ഇലക്‌ട്രോണിക് ഉപകരണങ്ങളോടുള്ള അടിമത്തം എന്നിവ ഇന്നത്തെ കുട്ടികൾ നേരിടുന്ന പ്രശ്‌നങ്ങളാണ്. സാമൂഹിക കൂട്ടായ്മകളും ഇടപെടലും കുറയ്ക്കാൻ ഇത് കാരണമാകുന്നു.
സാങ്കേതികവിദ്യയിലെ പുരോഗതി ലിംഗസമത്വത്തിനും കടമകൾ മനസിലാക്കാനും പരിസ്ഥിതി സംരക്ഷണത്തിനും ഉപയോഗിക്കാനാകണം. ഭിന്നശേഷിക്കാരായവരുടെ അവകാശങ്ങൾ സംരക്ഷിക്കേണ്ടതിന്റെ ആവശ്യകത കൂടി മനസിലാക്കിയാകണം കുട്ടികൾ വളരേണ്ടതെന്നും അദ്ദേഹം പറഞ്ഞു. കൗൺസിൽ ഫോർ ചൈൽഡ് വെൽഫയർ ജനറൽ സെക്രട്ടറി ഭരത് എസ്. നായിക് നന്ദിയും പറഞ്ഞു. രാജ്യത്തെ വിവിധ സംസ്ഥാനങ്ങളിൽനിന്ന് 250 ഓളം കുട്ടികളാണ് ജൂൺ മൂന്ന് വരെ നീളുന്ന ക്യാമ്പിൽ പങ്കെടുക്കുന്നത്.
Post Your Comments