ലഖ്‌നൗ: ജയിലില്‍ കൊലക്കേസ് പ്രതികളായ രണ്ട് പേര്‍ പിസ്റ്റളും പിടിച്ച് ഫോട്ടോയ്ക്ക് പോസ് ചെയ്യുന്ന വീഡിയോ വിവാദമാകുന്നു. ഉന്നാവോ ജയിലില്‍ നിന്നാണ് കൊലക്കേസ് പ്രതികളായ രണ്ട് പേര്‍ പിസ്റ്റളും പിടിച്ച് ഫോട്ടോയ്ക്ക് പോസ് ചെയ്യുന്ന വീഡിയോ പുറത്തുവന്നത്. വ്യത്യസ്ത കൊലക്കേസുകളില്‍ പ്രതികളായ ഗൗരവ് പ്രതാപ് സിങ്ങും അംരിശ് രാവത്തും തോക്കുകളേന്തി നില്‍ക്കുന്ന വീഡിയോയാണ് വിവാദമായിരിക്കുന്നത്. എന്നാല്‍ ഇത് യഥാര്‍ഥ തോക്കുകള്‍ അല്ലെന്നും കളിമണ്ണിലുണ്ടാക്കിയ തോക്കാണെന്നുമാണ് ജയിലധികൃതര്‍ നല്‍കുന്ന വിശദീകരണം. എന്നാല്‍ ജയിലധികൃതരുടെ വിശദീകരണം കൂടുതല്‍ വിവാദത്തിനിടയാക്കി.
‘ചിത്രകലാകാരനാണ് അങ്കൂര്‍. ഇയാള്‍ കളിമണ്ണിലുണ്ടാക്കിയ തോക്ക്;കറുത്ത ചായം നല്‍കി ഫോട്ടോയ്ക്ക് പോസ് ചെയ്യുകയായിരുന്നു’ എന്നാണ് ജയിലധികൃതരുടെ വിശദീകരണം. അതേസമയം മൊബൈല്‍ ഫോണുകള്‍ ജയിലിനുള്ളില്‍ ലഭ്യമായിരുന്നുവെന്നത് ജയിലധികൃതര്‍ നിഷേധിച്ചിട്ടില്ല.
വിവാദമായ വീഡിയോയില്‍ ഇരു പ്രതികളും കമ്പിളി വസ്ത്രങ്ങളായിരുന്നു ധരിച്ചിരുന്നത്. അതിനാല്‍ വീഡിയോ ശൈത്യകാലത്ത് എടുത്തതാകണമെന്നാണ് പൊലീസിന്റെ നിഗമനം. ജയിലധികൃതരും സംഭവത്തില്‍ പങ്കാളികളാണെന്ന് വീഡിയോയില്‍ വ്യക്തമാണ്. ഇവര്‍ക്കെതിരേ അന്വേഷണത്തിന് ഉത്തരവിട്ടിട്ടുണ്ട്.
Post Your Comments