ജമ്മു•കശ്മീരിന് പ്രത്യേക പദവി നല്‍കിയിരുന്ന ആര്‍ട്ടിക്കിള്‍ 370 റദ്ദാക്കിയതിന് പിന്നാലെ ബി.ജെ.പിയില്‍ ചേക്കേറുന്ന സാമൂഹ്യ-രാഷ്ട്രീയ പ്രവര്‍ത്തകരുടെ എണ്ണം വര്‍ധിക്കുന്നതായി റിപ്പോര്‍ട്ട്. മുതിര്‍ന്ന പി.ഡി.പി നേതാവും രണ്ട് മുന്‍ ഉന്നത ഉദ്യോഗസ്ഥരുമടക്കം 500 ലേറെ പേരാണ് കഴിഞ്ഞ ദിവസം ബി.ജെ.പിയില്‍ ചേര്‍ന്നത്.
ജമ്മു കശ്മീർ പീപ്പിൾസ് ഡെമോക്രാറ്റിക് പാർട്ടിയുടെ (പിഡിപി) സംസ്ഥാന ജനറൽ സെക്രട്ടറി ഫാക്കിർ ചന്ദ് ഭഗത്, മുൻ ഐ‌എ‌എസ് ഉദ്യോഗസ്ഥൻ ജി ആർ ഭഗത്, മുൻ കെ‌എ‌എസ് ഉദ്യോഗസ്ഥൻ കുൽദീപ് ഖജൂരിയ എന്നിവരും മറ്റു 500 ഓളം പേരും ബി.ജെ.പി ദേശീയ വൈസ് പ്രസിഡന്റ് അവിനാശ് റായ് ഖന്നയുടെ സാന്നിധ്യത്തിൽ ബിജെപിയിൽ ചേര്‍ന്നതായി പാര്‍ട്ടി വക്താവ് അറിയിച്ചു.
പാർട്ടിയിൽ ചേർന്ന 500 രാഷ്ട്രീയ സാമൂഹിക പ്രവർത്തകരിൽ പ്രമുഖർ പിഡിപി മേഖലാ പ്രസിഡന്റും സർപഞ്ച് ഭഗവാൻ ദാസ് ശർമയും പിഡിപിയുടെ ബിഷ്ന യൂത്ത് വിംഗ് പ്രസിഡന്റും ജില്ലാ കോർഡിനേറ്ററുമായ ബബ്ലു ശർമ, മുൻ ബ്ലോക്ക് ഡവലപ്മെന്റ് ഓഫീസർ ബബദിത ശർമ്മ, യൂത്ത് കോൺഗ്രസ് സെക്രട്ടറി ബൽ‌രാജ് സിംഗ് ചരക് എന്നിവരും ഉൾപ്പെടുന്നു.
ബി.ജെ.പിയുടെ നയങ്ങളാണ് ജനങ്ങളെ പാര്‍ട്ടിയിലേക്ക് ആകര്‍ഷിക്കുന്നതെന്ന് പുതുതായി ചേര്‍ന്നവരെ സ്വാഗതം ചെയ്ത് കൊണ്ട് ഖന്ന പറഞ്ഞു. ജനസംഘത്തിന്റെ തുടക്കം മുതൽ ബിജെപി അതിന്റെ രാഷ്ട്രനിർമ്മാണ അജണ്ടയുമായി മുന്നേറുകയും അതിന്റെ വാക്കുകളും പ്രവൃത്തികളും തമ്മിൽ സമന്വയിപ്പിക്കുകയും ചെയ്തു. ആർട്ടിക്കിൾ 370 ൽ നിർണ്ണായക നടപടി സ്വീകരിക്കുന്നതിലൂടെ വാഗ്ദാനം ചെയ്ത കാര്യം തങ്ങള്‍ നിറവേറ്റിയെന്നും അദ്ദേഹം വ്യക്താക്കി.
വരാനിരിക്കുന്ന ബ്ലോക്ക് ഡവലപ്മെൻറ് കൗൺസിൽ (ബിഡിസി) തെരഞ്ഞെടുപ്പിൽ കശ്മീരിൽ മാത്രം 15 സീറ്റുകളിൽ ബി.ജെ.പി ഇതിനകം തന്നെ വിജയം നേടിയിട്ടുണ്ട്. ഒക്ടോബർ 24 ന് ബി.ജെ.പിയെ അനുകൂലിച്ച് കനത്ത പോളിംഗ് നടക്കുമെന്ന് അവിനാശ് ഖന്ന പറഞ്ഞു.
പുതുതായി സൃഷ്ടിച്ച കേന്ദ്രഭരണ പ്രദേശങ്ങളായ ജമ്മു കശ്മീർ, ലഡാക്ക് ഒക്ടോബർ 31 ന് ശേഷം വൻ പരിവർത്തനത്തിന് ഒരുങ്ങുകയാണെന്ന് അവിനാശ് ഖന്ന പറഞ്ഞു.
Post Your Comments