ബദ്വാന്‍: പണവും ആഭരണങ്ങളുമായി നവവധു മുങ്ങി. ഉത്തര്‍പ്രദേശ് ബദ്വാനിലെ ഛോട്ടാപരാ ഗ്രാമത്തിലാണ് സംഭവം. ഭര്‍ത്താവിന്റെ മാതാപിതാക്കള്‍ക്ക് മയക്കുമരുന്ന് നല്‍കിയാണ് നവവധുവിന്റെ മുങ്ങല്‍. പ്രവീണ്‍ എന്നയാളുടെ ഭാര്യ റിയയാണ് പണവും ആഭരണങ്ങളുമായി കടന്നുകളഞ്ഞത്. ഡിസംബര്‍ ഒമ്പതിനായിരുന്നു റിയയും പ്രവീണും തമ്മിലുള്ള വിവാഹം. വെള്ളിയാഴ്ച രാത്രിയാണ് റിയ ഭര്‍ത്താവിന്റെ മാതാപിതാക്കള്‍ക്ക് മയക്കുമരുന്ന് കലര്‍ത്തിയ ഭക്ഷണം നല്‍കിയത്. ഇതിനുപിന്നാലെ 70000 രൂപയും മൂന്നുലക്ഷത്തോളം രൂപ വിലവരുന്ന ആഭരണങ്ങളുമായി കടന്നുകളയുകയായിരുന്നു.
സംഭവത്തില്‍ പൊലീസ് അന്വേഷണം ആരംഭിച്ചു. ഭാര്യ ഒരിക്കലും ഇങ്ങനെ വഞ്ചിക്കുമെന്ന് കരുതിയില്ലെന്നായിരുന്നു പ്രവീണിന്റെ പ്രതികരണം. അതേസമയം, ഇവരുടെ വിവാഹത്തിന് ഇടനിലക്കാരനായിരുന്ന ടിങ്കു എന്നയാളെയും സംഭവദിവസം മുതല്‍ കാണാതായിട്ടുണ്ട്. പ്രവീണിന്റെയും റിയയുടെയും വിവാഹം നടത്തിയത് ടിങ്കുവായിരുന്നു എന്നും ഇയാളെയും കഴിഞ്ഞദിവസം മുതല്‍ കാണാനില്ലെന്നും പോലീസ് പറഞ്ഞു. ഇരുവരെയും കണ്ടെത്താന്‍ അന്വേഷണം ഊര്‍ജിതമാക്കിയതായും പോലീസ് അറിയിച്ചു. റിയയുടേത് ദരിദ്ര കുടുംബമാണെന്ന് പറഞ്ഞ് ടിങ്കു നേരത്തെ പണം വാങ്ങിയിട്ടുണ്ടെന്നും പ്രവീണിന്റെ മാതാപിതാക്കള്‍ക്ക് പരാതിയുണ്ട്. വിവാഹാഭരണങ്ങള്‍ക്കായാണ് ഈ പണം വാങ്ങിയതെന്ന് പ്രവീണിന്റെ കുടുംബം പ്രതികരിച്ചു.
Post Your Comments