ന്യൂഡല്‍ഹി: രാജ്യത്താകമാനം കോവിഡ് വൈറസിനെക്കുറിച്ചുള്ള ഭീതിയിലും ആശങ്കയിലും കഴിയവേ ഡല്‍ഹിയില്‍ പരിഭ്രാന്തി പരത്തി മലയാളി യുവാവ്. കഴിഞ്ഞ ദിവസം വിദേശത്ത് നിന്നെത്തിയ യുവാവിന് വൈറസ് ബാധ സംശയിച്ചിരുന്നു. ഇക്കാര്യം ഇയാള്‍ തന്നെയാണ് വെളിപ്പെടുത്തിയത്. എന്നാല്‍, ഇയാള്‍ ആശുപത്രിയില്‍ പോകാതെ നേരെ ആളുകള്‍ തിങ്ങിപ്പാര്‍ക്കുന്ന നഗരത്തിലെ തിരക്കേറിയ സ്ഥലത്തെ ഫ്ളാറ്റില്‍ കയറി താമസിച്ചു. ഇതോടെ പ്രദേശവാസികള്‍ക്കിടയില്‍ പരിഭ്രാന്തി പടര്‍ന്നു.
ബുധനാഴ്ച രാത്രി പരിസര വാസികള്‍ വിവിധ ഹെല്‍പ് ലൈന്‍ നന്പറുകളില്‍ വിളിച്ചെങ്കിലും പ്രതികരണം ഉണ്ടായില്ല. ഒടുവില്‍ പോലീസ് സഹായത്തോടെ ഡല്‍ഹി ആര്‍എംഎല്‍ ആശുപത്രിയിലെ ഐസൊലേഷന്‍ വാര്‍ഡില്‍ പ്രവേശിപ്പിച്ചു. എന്നാല്‍, വ്യാഴാഴ്ച പുലര്‍ച്ചെ തന്നെ ഐസൊലേഷന്‍ വാര്‍ഡില്‍ നിന്നു ചാടിയ ഇയാള്‍ വീണ്ടും ഫ്ളാറ്റിലെത്തി. വിദേശത്ത് നിന്ന് കഴിഞ്ഞ ദിവസം ഡല്‍ഹിയിലെ ഫ്ളാറ്റിലെത്തിയ ഇയാള്‍ നിരവധി പേരുമായി ഇടപഴകുകയും ചെയ്തു.
വ്യാഴാഴ്ച വൈകുന്നേരവും ഇയാള്‍ ഫ്ളാറ്റിന്‍റെ വാതിലുകള്‍ തുറന്ന് അകത്തു കഴിയുകയാണ്.ഇതോടെ പരിസരത്തെ ഫ്ളാറ്റുകളില്‍ ഉള്ളവരെല്ലാം പരിഭ്രാന്തരായി.ഇതിനിടെ പലതവണ പുറത്തു പോകുകയും ചെയ്തു. വീണ്ടും സഹായം തേടിയതോടെ പോലീസ് ആംബുലന്‍സുമായെത്തി വീണ്ടും ആര്‍എംഎല്‍ ആശുപത്രിയില്‍ പ്രവേശിച്ചു.
Post Your Comments