ലോക്ക്ഡൗൺ; ജോലിയില്ലാത്തതിനാൽ നിരാശനായ യുവാവ് മൊബൈൽഫോൺ വിറ്റ് വീട്ടിലേക്ക് സാധനങ്ങൾ വാങ്ങിയശേഷം ആത്മഹത്യ ചെയ്തു

​ഗുഡ്​ഗാവ്; ലോക്ക് ഡൗണിന് പിന്നാലെ കാര്യമായ ജോലികൾ ലഭിക്കാതിരുന്ന യുവാവ് ആത്മഹത്യ ചെയ്തു, ബീഹാറിലെ മാധേപുര സ്വദേശിയായ യുവാവാണ് ആത്മഹത്യ ചെയ്തത്.

ആകെ സമ്പാദ്യമായി കയ്യിലുണ്ടായിരുന്ന മൊബൈൽ ഫോൺ 2500 രൂപയ്ക്ക് വിറ്റ ശേഷം , വീട്ടിലേക്ക് ആവശ്യ വസ്തുക്കളും ഫാനും വാങ്ങിയ ശേഷമായിരുന്നു ആത്മഹത്യ.

പെയിന്റിംങ് തൊഴിലാളിയായിരുന്നു ഛാബു മണ്ഡലെന്ന യുവാവാണ് ജീവനൊടുക്കിയത്, മാതാപിതാക്കളും 4 കുട്ടികളും ഭാര്യയും അടങ്ങുന്ന കുടുംബത്തിന് ഭക്ഷണമടക്കമുള്ളവ വാങ്ങി നൽകാൻ സാധിക്കാത്തതിൽ യുവാവ് അസ്വസ്ഥനായിരുന്നതായി പറയപ്പെടുന്നു.

സരസ്വതി കുഞ്ജ് മേഖലയിൽ ഷെഡ് കെട്ടിയായിരുന്നു , യുവാവും കുടുംബവും താമസിച്ചിരുന്നത്, സമീപവാസികളാണ് കുടുംബത്തെ സഹായിച്ചിരുന്നത്, ഭാര്യ കുഞ്ഞുങ്ങളുമായി പുറത്ത് പോയ സമയത്താണ് യുവാവ് ജീവനൊടുക്കിയത്.

സൗജന്യ ഭക്ഷണം ലഭ്യമായിരുന്നെങ്കിലും ഭിന്നശേഷിക്കാരനായ തനിക്കും , ചെറുമക്കളേയും പ്രായമായ ഭാര്യയേയും കൂട്ടി അത്രദൂരം നടന്നുപോയി അവ വാങ്ങാനും കഴിഞ്ഞിരുന്നില്ലെന്ന് യുവാവിന്റെ ഭാര്യാ പിതാവ് വ്യക്തമാക്കി.

ജോലികൾ കുറഞ്ഞതിനാൽ വാടക നൽകാൻ കഴിയാതിരുന്ന യുവാവിനെ വീട്ടുടമസ്ഥൻ ശകാരിക്കുക കൂടി ചെയ്തതോടെ യുവാവ് അസ്വസ്ഥനായിരുന്നുവെന്ന് ഭാര്യ പൂനം വ്യക്തമാക്കി.