യു.എ.ഇയില്‍ ഇന്നത്തെ കൊറോണ വൈറസ് കേസുകള്‍ പ്രഖ്യാപിച്ചു

അബുദാബി • യു.എ.ഇയില്‍ 553 പുതിയ കോവിഡ് 19 കേസുകള്‍ കൂടി സ്ഥിരീകരിച്ചതായി ആരോഗ്യ-പ്രതിരോധ മന്ത്രാലയം വെള്ളിയാഴ്ച അറിയിച്ചു. ഇതോടെ രാജ്യത്തെ മൊത്തം കേസുകളുടെ എണ്ണം 16, 793 ആയി.

265 പേര്‍ക്ക് രോഗം ഭേദമായതായും ഒമ്പത് പേര്‍ മരണപ്പെട്ടതായും മന്ത്രാലയം അറിയിച്ചു. ഇതുവരെ 3,837 പേര്‍ക്ക് രോഗം ഭേദമായി. രാജ്യത്തെ ആകെ മരണസംഖ്യ 174 ആയി.

ആരോഗ്യ-പ്രതിരോധ മന്ത്രാലയം 41,000 കോവിഡ് -19 പരിശോധനകൾ നടത്തി. പുതിയ കേസുകള്‍ക്ക് മതിയായ ആരോഗ്യപരിചരണം ലഭിക്കുന്നുണ്ടെന്നും മന്ത്രാലയം വ്യക്തമാക്കി.

കോവിഡില്‍ നിന്നുള്ള രോഗമുക്തി നിരക്കില്‍ വർദ്ധനവിന് മെയ് മാസം സാക്ഷ്യം വഹിച്ചു. രോഗമുക്തി ശരാശരി ഈ മാസം 150 കേസുകളാണ്, മുൻ മാസങ്ങളിൽ ശരാശരി ഭേദപ്പെടല്‍ 100 ആയിരുന്നു.

അതേസമയം, മാളുകൾ ഉപഭോക്താക്കളെ സ്വാഗതം ചെയ്യാൻ തുടങ്ങിയിട്ടുണ്ടെങ്കിലും മുതിർന്ന പൗരന്മാരും കുട്ടികളും വീട്ടിൽ തന്നെ തുടരണമെന്ന് സർക്കാർ നിർദ്ദേശിച്ചു.

60 വയസ്സിനു മുകളിലുള്ളവർക്കും 12 വയസ്സിന് താഴെയുള്ള കുട്ടികൾക്കും ഷോപ്പിംഗ് മാളുകൾ, സഹകരണ സംഘങ്ങൾ, സൂപ്പർമാർക്കറ്റുകൾ എന്നിവയിൽ പ്രവേശിക്കുന്നത് വിലക്കിയിട്ടുണ്ടെന്ന് ആരോഗ്യമന്ത്രാലയവും നാഷണൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്‌മെന്റ് അതോറിറ്റിയും സംയുക്ത പ്രഖ്യാപനത്തിൽ ഈ ആഴ്ച ആദ്യം വ്യക്തമാക്കിയിരുന്നു. ഷോപ്പിംഗ് സെന്ററുകൾക്ക് പുറത്ത് സ്ഥിതിചെയ്യുന്ന റീട്ടെയിൽ സ്റ്റോറുകളിൽ പ്രവേശിക്കുന്നതും നിരോധിച്ചിട്ടുണ്ട്.