ഖത്തറിൽ ആശങ്ക ഒഴിയുന്നില്ല, 3പേർകൂടി കോവിഡ് ബാധിച്ച് മരിച്ചു , രോഗം സ്ഥിരീകരിച്ചവർ അരലക്ഷം കടന്നു

ദോഹ : ഖത്തറിൽ ആശങ്ക ഒഴിയുന്നില്ല, കഴിഞ്ഞ 24 മണിക്കൂറിനിടെ 3പേർകൂടി കോവിഡ് ബാധിച്ച് മരിച്ചു. തീവ്രപരിചരണ വിഭാഗത്തില്‍ ചികിത്സയില്‍ ആയിരുന്ന 84 ഉം 48 ഉം 65 ഉം വയസുള്ളവരാണ് മരിച്ചത്. വിട്ടുമാറാത്ത മറ്റു രോഗങ്ങള്‍ കൂടിയുള്ളതാണ് ആരോഗ്യനില മോശമാകാന്‍ കാരണം. പ്രവാസിയാണോ സ്വദേശിയാണോ എന്നത് അധികൃതര്‍ വെളിപ്പെടുത്തിയിട്ടില്ല. 1,993 പേര്‍ക്ക് കൂടി രോഗം സ്ഥിരീകരിച്ചു. ഇതുവരെയുള്ള പ്രതിദിന രോഗസംഖ്യയില്‍ വച്ചേറ്റവും ഉയര്‍ന്ന സംഖ്യയാണ് ഇന്നത്തേത്.ഇതോടെ രാജ്യത്ത് മരിച്ചവരുടെ എണ്ണം 36ഉം, രോഗം സ്ഥിരീകരിച്ചവർ 52,907ഉം ആയതായി ആരോഗ്യ മന്ത്രാലയം അറിയിച്ചു.

രോഗം ഭേദമാകുന്നവരുടെ പ്രതിദിന എണ്ണത്തിലും വര്‍ധനയുണ്ട്. 5,205 പേര്‍ കൂടി സുഖം പ്രാപിച്ചതോടെ രോഗമുക്തി നേടിയവരുടെ എണ്ണം 20,604 ആയി ഉയർന്നു. നിലവിൽ 32,267പേരാണ് ചികിത്സയിലുള്ളത്. 216 പേര്‍ തീവ്ര പരിചരണ വിഭാഗത്തിലാണ്. രോഗബാധിതരുമായി സമ്പര്‍ക്കം പുലര്‍ത്തുന്നവരെ കണ്ടെത്തി പരിശോധനക്ക് വിധേയമാക്കുന്നതിനാല്‍, ഇവരുടെ എണ്ണവും ഉയരുന്നുണ്ട്. 24 മണിക്കൂറിനിടെ 5,864 പേരില്‍ കൂടി കോവിഡ് പരിശോധന നടത്തിയതോടെ പരിശോധനക്ക് വിധേയമായവരുടെ എണ്ണം 2,12,897ആയി ഉയർന്നു.

Also read : ദക്ഷിണ കൊറിയയില്‍ വീണ്ടും കൊവിഡ് ഭീതി; ബുധനാഴ്ച തുറന്ന സ്‌കൂളുകള്‍ വീണ്ടും അടച്ചു

സൗദിയിൽ കോവിഡ് ബാധിച്ച് 17പേർ കൂടി വ്യാഴാഴ്ച്ച മരിച്ചു. ഏഴുപേർ വീതം മക്കയിലും ജിദ്ദയിലും ഒരാൾ മദീനയിലും രണ്ടുപേർ ദമ്മാമിലുമാണ് മരിച്ചത്. 1581 പേർക്ക് കൂടി രോഗം സ്ഥിരീകരിച്ചു. ഇതോടെ രാജ്യത്ത് കോവിഡ് ബാധിച്ച് മരിച്ചവരുടെ എണ്ണം 458ഉം, രോഗം സ്ഥിരീകരിച്ചവരുടെ ആകെ എണ്ണം 81766ഉം ആയതായി ആരോഗ്യമന്ത്രാലയം അറിയിച്ചു. 2460 പേർ സുഖം പ്രാപിച്ചതോടെ രോഗമുക്തി നേടിയവരുടെ എണ്ണം 57013ആയി ഉയർന്നു. നിലവിൽ 24,295 പേരാണ് ആശുപത്രികളിൽ ചികിത്സയിലുള്ളൂ. രാജ്യത്താകെ ഇതുവരെ 787,465 കോവിഡ്​ പരിശോധനകൾ നടന്നു.