ന്യൂഡല്‍ഹി: ഇന്ത്യ-ചൈന സംഘര്‍ഷം നിലനില്‍ക്കുന്നതിനിടെ ഇന്ത്യ-യുഎസ് സൈനികാഭ്യാസം. ഇന്ത്യന്‍ നാവികസേനയും യുഎസ് നാവികസേനയുമാണ് സംയുക്ത സൈനികാഭ്യാസം നടത്തിയത്. യുഎസിന്‍റെ ഏറ്റവും വലിയ വിമാനവാഹിനിക്കപ്പലായ യുഎസ്‌എസ് നിമിറ്റ്സാണ് സൈനികാഭ്യാസത്തില്‍ പങ്കെടുത്തത്. നിലവില്‍ ആന്‍ഡമാന്‍ പ്രദേശത്തു നിലയുറപ്പിച്ചിരിക്കുന്ന ഇന്ത്യന്‍ നാവികസേനയുടെ കപ്പല്‍വ്യൂഹമാണ് സൈനികാഭ്യാസത്തിന്‍റെ ഭാഗമായത്.
130 യുദ്ധവിമാനങ്ങള്‍ വരെ വഹിക്കാന്‍ ശേഷിയുള്ള നിമിറ്റ്സ് ലോകത്തിലെ ഏറ്റവും വലിയ യുദ്ധ കപ്പല്‍ ആണ്. ഏതാനും ആഴ്ചകളായി ദക്ഷിണ ചൈനാ കടലില്‍ നിമിറ്റ്സ് നിലയുറപ്പിച്ചിരുന്നു. അവിടെനിന്ന് ഗള്‍ഫ് മേഖലയിലേക്കുള്ള യാത്രാമധ്യേയാണ് ഇന്ത്യന്‍ സേനയുമായി അഭ്യാസപ്രകടനം നടത്തിയത്. ബംഗാള്‍ ഉള്‍ക്കടലില്‍ ആന്‍ഡമാന്‍ നിക്കോബാര്‍ ദ്വീപുകള്‍ക്ക് സമീപമായിരുന്നു സൈനികാഭ്യാസം.
ഇന്ത്യന്‍ നേവി ഈയിടെ ജപ്പാനുമായി നാവികാഭ്യാസം നടത്തിയിരുന്നു.ചൈനയുമായി അമേരിക്കയുടെ ബന്ധം അങ്ങേയറ്റം വഷളായി നില്‍ക്കുന്ന സാഹചര്യമാണ് നിലവിലുള്ളത്.ഈയൊരു ഘട്ടത്തില്‍, ഇന്ത്യന്‍ സമുദ്രത്തിലെ സഹകരണം ഉറപ്പാക്കാന്‍ വേണ്ടിയാണ് അമേരിക്ക ഈ സംയുക്ത നാവിക അഭ്യാസത്തിന് മുന്‍കൈയെടുത്തത്.
Post Your Comments