ഇന്ത്യ ഉൾപ്പെടെയുള്ള ലോക സമൂഹത്തിനും ഐക്യ രാഷ്​ട്രസഭക്കും പുതുക്കിയ നേപ്പാൾ ഭൂപടം അയച്ചുകൊടുക്കും; ​മന്ത്രി പദ്​മ ആര്യാൽ

കാഠ്​മണ്ഡു : കാലാപാനി, ലിപുലേഖ്​, ലിംപിയാദുര, എന്നീ ഇന്ത്യൻ ഭൂപ്രദേശങ്ങൾ ചേർത്തുള്ള
പുതുക്കിയ നേപ്പാൾ ഭൂപടം ഇന്ത്യ ഉൾപ്പെടെയുള്ള ലോക സമൂഹത്തിനും ഐക്യ രാഷ്​ട്രസഭക്കും അയച്ചുകൊടുക്കുമെന്ന്​ നേപ്പാൾ ഭൂ പരിപാലന-സഹകരണ​- ദാരിദ്ര്യ നിർമാർജ്ജന വകുപ്പ് മന്ത്രി പദ്​മ ആര്യാൽ പറഞ്ഞു. ഈ മാസം പകുതിയോടെ ഈ പ്രക്രിയ പൂർണമാവുമെന്നും അവർ വ്യക്തമാക്കി.

ഇംഗ്ലീഷ്​ ഭാഷയിൽ തയാറാക്കിയ പുതുക്കിയ നേപ്പാൾ ഭൂപടത്തി​ന്റെ 4000 പകർപ്പുക​ൾ അന്താരാഷ്​ട്ര സമൂഹത്തിന്​ അയച്ചുകൊടുക്കുവാൻ മന്ത്രാലയം ബന്ധപ്പെട്ട വകുപ്പുകൾക്ക്​ നിർദേശം നൽകിയിട്ടുണ്ട്. കൂടാതെ ഭൂപടത്തി​​ന്റെ 25,000ത്തോളം പകർപ്പുകൾ രാജ്യമെമ്പാടും വിതരണം ചെയ്​തിട്ടുണ്ട്​. വിവിധ പ്രവിശ്യകളിലും സർക്കാർ ഓഫീസുകളിലും ഇത്​ സൗജന്യ നിരക്കിൽ നൽകും​. മെയ്​ 20നാണ്​ നേപ്പാൾ സർക്കാർ ഇന്ത്യൻ പ്രദേശങ്ങളായ കാലാപാനി, ലിപുലേഖ്​, ലിംപിയാദുര, എന്നിവ ചേർത്ത്​ ഭൂപടം പുതുക്കി പ്രസിദ്ധീകരിച്ചത്​.

അതേസമയം, നേപ്പാളിന്റെ ഏകപക്ഷീയമായ നീക്കം ചരിത്ര വസ്​തുതകളെയും തെളിവുക​ളെയും അടിസ്ഥാനമാക്കിയല്ലെന്ന്​ ഇന്ത്യ പ്രതികരിച്ചു. അതിർത്തി തർക്കം പരിഹരിക്കുന്നതിനുള്ള ഉഭയകക്ഷി പ്രവർത്തനങ്ങൾക്കും നയതന്ത്ര ചർച്ചകൾക്കും കടകവിരുദ്ധമാണ് നേപ്പാളി​ന്റെ ഈ നീക്കമെന്നും   ഇത്തരം കൃത്രിമമായ ഭൂവിസ്​തൃതി വർദ്ധിപ്പിക്കൽ അവകാശവാദം അംഗീകരിക്കില്ലെന്നും ഇന്ത്യ വ്യക്തമാക്കി.