ദില്ലി : കഴിഞ്ഞ 72 വര്‍ഷത്തിനിടയില്‍ ഏറ്റവും മോശം അവസ്ഥയിലാണ് കോണ്‍ഗ്രസ് എന്ന് പാര്‍ട്ടിയിലെ മുതിര്‍ന്ന് നേതാവ് ഗുലാം നബി ആസാദ്. ബീഹാര്‍ നിയമസഭാ തെരഞ്ഞെടുപ്പിലെ പരാജയത്തെക്കുറിച്ചും മറ്റു ഉപതിരഞ്ഞെടുപ്പുകളെയും കുറിച്ച് കോണ്‍ഗ്രസ് നേതാക്കള്‍ക്കിടയില്‍ ഉണ്ടായ വാക്കുതര്‍ക്കത്തിനിടെയാണ് ഗുലാം നബി ആസാദ് ഇക്കാര്യം തുറന്നടിച്ചത്. പാര്‍ട്ടിയുടെ നേതൃത്വത്തെ കുറിച്ച് പോലും നേതാക്കള്‍ക്കിടയില്‍ ചോദ്യമുയരുന്നുണ്ട്. ഇതിനിടയിലാണ് വിമര്‍ശനവുമായി മുതിര്‍ന്ന നേതാവ് രംഗത്തെത്തിയിരിക്കുന്നത്.
കഴിഞ്ഞ 72 വര്‍ഷത്തിനിടയില്‍ കോണ്‍ഗ്രസ് ഏറ്റവും മോശം അവസ്ഥയിലാണ്. കഴിഞ്ഞ രണ്ട് തവണ ലോക്‌സഭയില്‍ പ്രതിപക്ഷ നേതാവ് സ്ഥാനം പോലും കോണ്‍ഗ്രസിന് ഇല്ല. എന്നാല്‍ ലഡാക്ക് ഹില്‍ കൗണ്‍സില്‍ തെരഞ്ഞെടുപ്പില്‍ കോണ്‍ഗ്രസ് 9 സീറ്റുകള്‍ നേടി. നല്ല ഫലം, പാര്‍ട്ടി ഈ ഫലം പ്രതീക്ഷിച്ചിരുന്നില്ല ”ആസാദ് എഎന്‍ഐയോട് പറഞ്ഞു.
നഷ്ടത്തെക്കുറിച്ച് ഞങ്ങള്‍ എല്ലാവരും ആശങ്കാകുലരാണ്, പ്രത്യേകിച്ച് ബീഹാറിനെക്കുറിച്ചും ഉപതെരഞ്ഞെടുപ്പ് ഫലങ്ങളെക്കുറിച്ചും. നേതൃത്വത്തെ ഞാന്‍ കുറ്റപ്പെടുത്തുന്നില്ല. ഞങ്ങളുടെ ജനങ്ങള്‍ക്ക് നേതാക്കളുമായുള്ള ബന്ധം നഷ്ടപ്പെട്ടു. ഇന്നത്തെ നേതാക്കളുടെ പ്രശ്‌നം അവര്‍ക്ക് മത്സരിക്കാന്‍ പാര്‍ട്ടി ടിക്കറ്റ് ലഭിക്കുകയാണെങ്കില്‍, അവര്‍ ആദ്യം 5 സ്റ്റാര്‍ ഹോട്ടല്‍ ബുക്ക് ചെയ്യുന്നു. പരുക്കന്‍ റോഡുണ്ടെങ്കില്‍ അവര്‍ പോകില്ല. 5-സ്റ്റാര്‍ സംസ്‌കാരം ഉപേക്ഷിക്കുന്നതുവരെ ഒരാള്‍ക്ക് തെരഞ്ഞെടുപ്പില്‍ വിജയിക്കാന്‍ കഴിയില്ല ‘ അദ്ദേഹം പറഞ്ഞു.
Post Your Comments