‘ഇത് ആവും അടുത്ത മഹാമാരി’ നിപ വൈറസിനെക്കുറിച്ച് മുന്നറിയിപ്പ് നൽകി ശാസ്ത്രജ്ഞർ

കോവിഡിന്റെ പിടിയിൽ നിന്ന് ലോകം പതിയെ മുക്തി നേടിക്കൊണ്ടിരിക്കുമ്പോൾ അടുത്ത മഹാമാരിയെ കുറിച്ച് മുന്നറിയിപ്പ് നൽകി ശാസ്ത്രജ്ഞർ. മാരകമായ നിപ വൈറസിനെതിരെയാണ് ശാസ്ത്രജ്ഞർ  മുന്നറിയിപ്പ് നൽകിയിരിക്കുന്നത്. ഇത് അടുത്ത പാൻഡെമിക്കിന് കാരണമാകുമെന്ന് അവർ പറയുന്നു. 45% മുതൽ 75% വരെ മരണനിരക്ക് ഉള്ള നിപ വൈറസ് വലിയതോതിൽ അപകടകാരിയായ ഒരു പകർച്ചവ്യാധിയാണെന്ന് ബ്രിട്ടീഷ് ദിനപത്രമായ എക്സ്പ്രസ് റിപ്പോർട്ട് ചെയ്യുന്നു.

ഇന്നുവരെ ലോകമെമ്പാടുമുള്ള 2 ദശലക്ഷത്തിലധികം ആളുകൾ കൊല്ലപ്പെട്ട COVID-19 പാൻഡെമിക്കിനെ ലോകം ഇപ്പോഴും നേരിടുന്നതിനിടയിലാണ് ഈ മുന്നറിയിപ്പും. കെന്റക്കി സർവകലാശാലയുടെ മോളിക്യുലർ ആന്റ് സെല്ലുലാർ ബയോകെമിസ്ട്രി ചെയർമാനായ ഡോ. റെബേക്ക ഡച്ച് പറയുന്നതനുസരിച്ച്, നിപയെ 1999 ൽ മലേഷ്യയിൽ ആദ്യമായി തിരിച്ചറിഞ്ഞതുമുതൽ ഉയർന്ന മരണനിരക്കാണ് മറ്റു മഹാമാരികളെ അപേക്ഷിച്ച് വളരെ ഭയപ്പെടുത്തുന്നത്.

വൈറസിന്റെ കുടുംബ ചരിത്രം കാരണം വർദ്ധിച്ച സംക്രമണത്തിനുള്ള സാധ്യതയെ കുറിച്ചും ഡോ. റെബേക്ക ഡച്ച് മുന്നറിയിപ്പ് നൽകി . നിപയുടെ അതേ കുടുംബത്തിൽ നിന്നുള്ള വൈറസുകൾ എളുപ്പത്തിൽ വ്യാപിക്കുമെന്നും ഭക്ഷണം പോലുള്ള സ്രോതസ്സുകളിലൂടെ പകരാമെന്നും അവർ പറഞ്ഞു. ഫ്രൂട്ട് വവ്വാലുകളിൽ നിന്ന് ഉത്ഭവിക്കുന്ന നിപയുമായി ബന്ധപ്പെട്ട വൈറസുകളുടെ ജനിതക വൈവിധ്യത്തെക്കുറിച്ച് വളരെ കുറച്ച് വിവരങ്ങൾ മാത്രമേ ലഭ്യമാകൂ.

നിലവിൽ, നിപ വൈറസ് വലിയ തോതിൽ പകരുന്നതിന്റെ ഉദാഹരണങ്ങളൊന്നുമില്ല, കാരണം ഇത് രോഗബാധിതനുമായി അടുത്ത ബന്ധത്തിലൂടെ മാത്രമേ പകരുകയുള്ളു, പ്രത്യേകിച്ച് ശ്വാസകോശ സംബന്ധമായ അസുഖമുള്ള ആളുകൾക്കിടയിൽ. അടിയന്തിര ഗവേഷണവും വികസനവും ആവശ്യമായ രോഗങ്ങളുടെ പട്ടികയിൽ ലോകാരോഗ്യ സംഘടന (ഡബ്ല്യുഎച്ച്ഒ) നിപയെ ഉൾപ്പെടുത്തിയിട്ടുണ്ട്.

നിലവിൽ, നിപ രോഗത്തിന് ചികിത്സയോ വാക്സിനോ ഇല്ല. ഇന്ത്യ, ബംഗ്ലാദേശ്, സിംഗപ്പൂർ എന്നിവ ഉൾപ്പെടുന്ന തെക്കുകിഴക്കൻ ഏഷ്യൻ രാജ്യങ്ങളിൽ നിപ കേസുകൾ റിപ്പോർട്ട് ചെയ്യപ്പെട്ടിട്ടുണ്ട്.