പൊള്ളാര്‍ഡിന്റെ പവര്‍ ഹിറ്റിംഗിന് മുന്നില്‍ പകച്ച് ചെന്നൈ; അവസാന പന്തില്‍ ജയിച്ചു കയറി മുംബൈ

ഡല്‍ഹി: ആവേശം അവസാന പന്ത് വരെ നിറഞ്ഞു നിന്ന മത്സരത്തില്‍ ചെന്നൈ സൂപ്പര്‍ കിംഗ്‌സിനെ മുട്ടുകുത്തിച്ച് മുംബൈ ഇന്ത്യന്‍സ്. ചെന്നൈ ഉയര്‍ത്തിയ 219 റണ്‍സ് എന്ന കൂറ്റന്‍ വിജയലക്ഷ്യം 6 വിക്കറ്റ് നഷ്ടത്തില്‍ മുംബൈ മറികടന്നു. ഒറ്റയാള്‍ പോരാട്ടം നടത്തിയ കീറോണ്‍ പൊള്ളാര്‍ഡിന്റെ പ്രകടനമാണ് മുംബൈയ്ക്ക് മിന്നും വിജയം സമ്മാനിച്ചത്.

Also Read: കോവിഡ് ബാധിച്ച് മരിച്ചയാളുടെ പോക്കറ്റടിച്ച് ആശുപത്രി ജീവനക്കാര്‍; ഞെട്ടിക്കുന്ന സിസിടിവി ദൃശ്യങ്ങള്‍ പുറത്ത്

ഓപ്പണര്‍മാരായ ക്വിന്റണ്‍ ഡീകോക്കും(38) രോഹിത് ശര്‍മ്മയും(35) മുംബൈയ്ക്ക് മികച്ച തുടക്കമാണ് നല്‍കിയത്. ഒന്നാം വിക്കറ്റില്‍ 71 റണ്‍സാണ് ഇരുവരും കൂട്ടിച്ചേര്‍ത്തത്. മൂന്നാമനായെത്തിയ സൂര്യകുമാര്‍ യാദവ് 3 റണ്‍സുമായി മടങ്ങി. തുടര്‍ന്ന് ക്രീസില്‍ ഒരുമിച്ച ക്രുനാല്‍ പാണ്ഡ്യ-പൊള്ളാര്‍ഡ് സഖ്യം മുംബൈയുടെ ഇന്നിംഗ്‌സ് മുന്നോട്ട് കൊണ്ടുപോയി. ക്രുനാല്‍ 23 പന്തില്‍ 32 റണ്‍സ് നേടി. ഹര്‍ദ്ദിക് പാണ്ഡ്യ 7 പന്തില്‍ 16 റണ്‍സെടുത്തു. 34 പന്തില്‍ 6 ബൗണ്ടറികളും 8 സിക്‌സറുകളും പറത്തിയ പൊള്ളാര്‍ഡാണ് കളിയിലെ താരം.

ചെന്നൈയ്ക്ക് വേണ്ടി സാം കറന്‍ 4 ഓവറില്‍ 34 റണ്‍സ് വഴങ്ങി 3 വിക്കറ്റുകള്‍ വീഴ്ത്തി. ശര്‍ദ്ദൂല്‍ ഠാക്കൂര്‍, രവീന്ദ്ര ജഡേജ, മൊയീന്‍ അലി എന്നിവര്‍ ഓരോ വിക്കറ്റ് വീതം സ്വന്തമാക്കി. ജയത്തോടെ പോയിന്റ് പട്ടികയില്‍ മുംബൈ നാലാം സ്ഥാനത്തെത്തി. പരാജയപ്പെട്ടെങ്കിലും റണ്‍ റേറ്റിന്റെ പിന്‍ബലത്തില്‍ ചെന്നൈ ഒന്നാം സ്ഥാനത്ത് തുടരുകയാണ്.