ദുബായ് : 12 വയസ്സിന് മുകളിലുള്ള കുട്ടികള്‍ക്ക് വാക്സിനേഷന്‍ ഡ്രൈവുമായി യു.എ.ഇയിലെ സ്കൂളുകള്‍. ചില സ്കൂളുകള്‍ ഇതിന് ഹോട്ടലുകള്‍ ബുക്ക് ചെയ്തു. ആരോഗ്യ കേന്ദ്രങ്ങളുമായി സഹകരിച്ച്‌ വാക്സിനേഷന്‍ നടപ്പാക്കാന്‍ ശ്രമിക്കുന്ന സ്കൂളുകളുമുണ്ട്. വിദ്യാര്‍ഥികള്‍ക്കും ജീവനക്കാര്‍ക്കും പൂര്‍ണമായും വാക്സിന്‍ നല്‍കിയ ശേഷം സ്കൂളുകള്‍ 100 ശതമാനം ശേഷിയോടെ തുറന്നു പ്രവര്‍ത്തിപ്പിക്കാമെന്ന വിശ്വാസത്തിലാണ് മാനേജ്മെന്‍റുകള്‍.
42,000 കുട്ടികളുള്ള ജെംസ് സ്കൂള്‍ വാക്സിനേഷനുള്ള ഒരുക്കത്തിലാണ്. 8000 കുട്ടികള്‍ ഈ ആഴ്ച തന്നെ വാക്സിനെടുക്കും. 1800 കുട്ടികള്‍ വാക്സിനെടുത്തുകഴിഞ്ഞു. 14700 അധ്യാപകരും ജീവനക്കാരും വാക്സിനെടുത്തു. ഇതില്‍ 1600 പേരും പുതിയ അധ്യാപകരാണ്. ഇവരും വാക്സിനെടുക്കും. ഷാര്‍ജയിലെയും റാസല്‍ ഖൈമയിലെയും വിദ്യാഭ്യാസ അധികൃതരുമായി സഹകരിച്ചാണ് ഇത് നടപ്പാക്കുന്നത്.
ദുബൈയിലെ ഡല്‍ഹി പ്രൈവറ്റ് സ്കൂളിലെ വാക്സിനേഷന്‍ ഡ്രൈവ് 21ന് തുടങ്ങി. ദുബൈ ഗ്രാന്‍ഡ് ഹയാത്ത് ഹോട്ടലിലാണ് സൗകര്യമൊരുക്കിയിരിക്കുന്നത്. 27 വരെ തുടരും. 2300 കുട്ടികളാണ് ഇവിടെയുള്ളത്. വാക്സിനെടുക്കുന്നതോടെ കുട്ടികളെ സ്കൂളിലേക്കയക്കാന്‍ രക്ഷിതാക്കള്‍ക്ക് ആത്മവിശ്വാസം വര്‍ധിക്കുമെന്ന് മാനേജ്മെന്‍റ് പ്രതീക്ഷിക്കുന്നു.
Post Your Comments