ഇസ്ലാമാബാദ്: മോഷണക്കേസില്‍ നിരപരാധിത്വം തെളിയിക്കാന്‍ കുട്ടിയെ ചൂടാക്കിയ കോടാലി നക്കിപ്പിച്ച മൂന്നുപേര്‍ അറസ്റ്റില്‍. പാകിസ്ഥാന്‍ ഗ്രാമമായ തുമന്‍ ബുസ്ദാറിലെ മൂന്നുപേരെയാണ് ഫസാല കച്ചിലെ ബോര്‍ഡര്‍ മിലിറ്ററി പൊലീസ് അറസ്റ്റ് ചെയ്തത്. ആട്ടിടയനായ തെഹ്സീബിനാണ് ക്രൂരമര്‍ദനം ഏറ്റത്. ചായയുണ്ടാക്കുന്ന കെറ്റില്‍ മോഷ്ടിച്ചുവെന്നാരോപിച്ചാണ് മര്‍ദനം.
നാക്കിന് പൊള്ളലേറ്റ തെഹ്സീബിനെ വിദഗ്ധ ചികിത്സക്കായി തെഹ്സില്‍ ഹെഡ്ക്വാര്‍ട്ടേഴ്സ് ആശുപത്രിയില്‍ പ്രവേശിപ്പിച്ചു. പ്രതികളായ മൂന്നുപേര്‍ കോടാലി ചൂടാക്കുകയും കുട്ടിയെകൊണ്ട് അത് നക്കിപ്പിക്കുകയുമായിരുന്നു. തെഹ്സീബിന്‍റെ പിതാവിന്‍റെ പരാതിയില്‍ പൊലീസ് കേസ് രജിസ്റ്റര്‍ ചെയ്യുകയായിരുന്നു. സിറാജ്, അബ്ദുള്‍ റഹീം, മുഹമ്മദ് ഖാന്‍ എന്നിവരെയാണ് അറസ്റ്റ് ചെയ്തത്.
നിരപരാധിത്വം തെളിയിക്കാനായി അശാസ്ത്രീയ മാര്‍ഗങ്ങള്‍ ഇപ്പോഴും പിന്തുടരുന്ന പ്രദേശമാണിവിടം. ഗോത്രപ്രദേശമായ ബലൂച്ചില്‍ വെള്ളം, അഗ്നി തുടങ്ങിയവ ഉപയോഗിച്ച്‌ പല മാര്‍ഗങ്ങള്‍ സ്വീകരിച്ചുവരുന്നു. നിശ്ചിതസമയം വെള്ളത്തില്‍ മുങ്ങികിടക്കാന്‍ നിര്‍ബന്ധിക്കും, സമയത്തിന് ശേഷം ജീവനോടെ പുറത്തുവന്നാല്‍ നിരപരാധിയാണെന്ന് വിശ്വസിക്കും എന്നും പോലീസ് പറയുന്നു.
Post Your Comments