പുതിയ പൾസർ 250യുടെ ബുക്കിംഗ് ഉടൻ ആരംഭിക്കുമെന്ന് ബജാജ്

ദില്ലി: ബജാജ് ഓട്ടോ കഴിഞ്ഞ ദിവസമാണ് ജനപ്രിയ പള്‍സര്‍ ശ്രേണിയിലേക്ക് പുതിയ പള്‍സര്‍ 250 ട്വിന്‍ (പള്‍സര്‍ എഫ്250, പള്‍സര്‍ എന്‍250) എന്നിവയെ പുറത്തിറക്കിയത്. ഏറ്റവും വലിയ പള്‍സര്‍ എന്ന നിലയിലാണ് പുതിയ ബൈക്ക് എത്തുന്നത്. നേരത്തെ പള്‍സര്‍ ബൈക്കുകളുടെ കുടുംബത്തിന് ലഭിച്ച അതേ വിജയം പുതിയ ലോഞ്ചിലൂടെ ആവര്‍ത്തിക്കാന്‍ ഒരുങ്ങുകയാണ് കമ്പനി.

പുതിയ ബജാജ് പള്‍സര്‍ എന്‍ 250 പള്‍സര്‍ എഫ് 250 എന്നിവയുടെ ഓണ്‍ലൈന്‍ ബുക്കിംഗ് ഇതുവരെ ആരംഭിച്ചിട്ടില്ല. ടൂവീലര്‍ ബുക്ക് ചെയ്യാന്‍ ആഗ്രഹിക്കുന്നവര്‍ക്ക് ഡീലര്‍ഷിപ്പ് സ്റ്റോറില്‍ ചെന്ന് ബുക്ക് ചെയ്യാം എന്ന് ഇന്ത്യാ ടുഡേ റിപ്പോര്‍ട്ട് ചെയ്യുന്നു. ഇതിനായി ഉപഭോക്താക്കള്‍ 1000 മുതല്‍ 5000 രൂപ വരെ ടോക്കണ്‍ തുകയായി നല്‍കണം.

പൾസർ N250, പൾസർ F250 എന്നിങ്ങനെ രണ്ട് വേരിയന്റുകളിലാണ് പുതിയ ബജാജ് പൾസർ 250 അവതരിപ്പിച്ചിരിക്കുന്നത്. പുതിയ ട്യൂബുലാർ ഫ്രെയിം ഷാസിയിലാണ് ഈ ബൈക്ക് കമ്പനി വികസിപ്പിച്ചിരിക്കുന്നത്. DTS-i 4 സ്ട്രോക്ക് ഓയിൽ കൂൾഡ് ബിഎസ്6 എഞ്ചിനാണ് ബൈക്കിന്റെ ഹൃദയം. ഈ എഞ്ചിന്‍ പരമാവധി 24.5 പിഎസ് കരുത്തും 21.5 എൻഎം ടോർക്കും സൃഷ്ടിക്കും.

അഞ്ച് സ്‍പീഡാണ് ട്രാൻസ്‍മിഷന്‍. ഒരു സെമി-ഡിജിറ്റൽ മീറ്ററും നൽകിയിട്ടുണ്ട്, അതോടൊപ്പം ടാക്കോമീറ്റർ സൂചിയും നിലനിർത്തിയിട്ടുണ്ട്. പുതിയ ബജാജ് പൾസർ 250 യിൽ കമ്പനി പ്രൊജക്ടർ യൂണിപോഡ് ഹെഡ്‌ലാമ്പുകൾ നൽകിയിട്ടുണ്ട്. ഇതിൽ ഉപഭോക്താക്കൾക്ക് ബജാജ് പൾസർ F250 ന് അരികിലുള്ള റിവേഴ്സ് ബൂമറാംഗ് LED DRL ലഭിക്കും. ഇത് റോഡിൽ മികച്ച ദൃശ്യപരത നൽകുന്നു, ഇത് ബൈക്ക് നന്നായി നിയന്ത്രിക്കാൻ ഡ്രൈവറെ സഹായിക്കുന്നു.

Read Also:- ഇന്ത്യന്‍ ബോളിംഗ് കോച്ചിനെ വിമര്‍ശിച്ച് സുനില്‍ ഗവാസ്‌കര്‍

ഇതിനുപുറമെ 300എംഎം ഫ്രണ്ട് ഡിസ്‌ക് ബ്രേക്കും 230എംഎം പിൻ ഡിസ്‌ക് ബ്രേക്കും ഈ ബൈക്കുകളിൽ നൽകിയിട്ടുണ്ട്. മുൻവശത്ത് ടെലിസ്‌കോപ്പിക് സസ്പെൻഷനാണ് നൽകിയിരിക്കുന്നത്. പിൻഭാഗത്ത്, കമ്പനി ഒരു പുതിയ മോണോഷോക്ക് സസ്പെൻഷൻ യൂണിറ്റ് നൽകിയിട്ടുണ്ട്.