പാർട്ടി സമ്മേളനത്തിനു പിറകെ കോവിഡ് ജാഗ്രതാ പോസ്റ്റ്, പൊങ്കാലയിട്ട് ജനം : കമന്റ് ബോക്സ് പൂട്ടി തൃശ്ശൂർ കലക്ടർ

തൃശ്ശൂർ: സിപിഎം പാർട്ടി സമ്മേളനത്തിനു പുറകെ കോവിഡ് ജാഗ്രത പോസ്റ്റിട്ട തൃശൂർ കലക്ടർക്ക് വയറുനിറയെ പൊങ്കാല. സംസ്ഥാനത്ത് കോവിഡ് പടരുന്ന സാഹചര്യത്തിൽ,
‘കൂട്ടം കുറച്ചാൽ നേട്ടം കൂടും’ എന്ന ജാഗ്രതാ പോസ്റ്റാണ് കലക്ടർ തന്റെ ഔദ്യോഗിക അക്കൗണ്ടിൽ പോസ്റ്റ് ചെയ്തത്. നിമിഷനേരം കൊണ്ട് വിമർശന കമന്റുകൾ വന്ന് നിറയുകയായിരുന്നു.

അധികവും സിപിഎം സമ്മേളനത്തിന് ഫോട്ടോകളാണ് കമന്റുകളായി പോസ്റ്റ് ചെയ്യപ്പെട്ടത്. ജനങ്ങളുടെ നിലനിൽപ്പ് അപകടത്തിലാക്കിക്കൊണ്ടുള്ള ‘തിരുവാതിരകളി’ സംഘാടനത്തിനെതിരെ രൂക്ഷവിമർശനം ഉയർന്നിരുന്നു. ഇതുകൂടാതെ, പാർട്ടി സമ്മേളനം വെയ്ക്കണമെന്ന് ആവശ്യപ്പെട്ട് യൂത്ത് കോൺഗ്രസ് ഉൾപ്പെടെ നിരവധി സംഘടനകൾ പരാതി നൽകുകയും ചെയ്തിരുന്നു. എന്നാൽ ഫലപ്രദമായ നടപടിയൊന്നുമുണ്ടായില്ല.

ഈ സാഹചര്യത്തിലാണ്, സമ്മേളനം അവസാനിക്കുന്ന ദിവസം കലക്ടറുടെ ജാഗ്രതാ ഫേസ്ബുക്ക് പോസ്റ്റ് പ്രത്യക്ഷപ്പെട്ടത്. ഇതോടെ, പാർട്ടി സമ്മേളനത്തിന്റെ ഫോട്ടോകളും വിമർശന കമന്റുകളും കൊണ്ട് കമന്റ് ബോക്സ് നിറഞ്ഞു. ഈ സാഹചര്യത്തിലാണ് കളക്ടർ കമന്റ് ബോക്സ് പൂട്ടിയത്.