മിർച്ചി മ്യൂസിക് അവാർഡ്: സംഗീത മാമാങ്കത്തിൽ തിളങ്ങി മലയാളി താരങ്ങളും കാലാകാരന്മാരും

തിരുവനന്തപുരം: മിർച്ചി സൗത്തിന്റെ 12-ാമത് എഡിഷന്‍ അവാർഡ് പ്രഖ്യാപനത്തിൽ തിളങ്ങി മലയാളി താരങ്ങളും കലാകാരന്മാരും. മലയാള സംഗീത വ്യവസായത്തിലെ മികച്ച പ്രതിഭകളെ അംഗീകരിക്കുന്നതിനായി ഇന്ത്യയിലെ നമ്പർ വൺ റേഡിയോ, വിനോദ കമ്പനിയായ മിർച്ചി അവതരിപ്പിച്ച ‘മിർച്ചി മ്യൂസിക് അവാർഡ് സൗത്ത്’ ശ്രദ്ധേയമായി. സമാനതകളില്ലാത്ത സംഗീത പ്രതിഭകളെ ആദരിക്കുകയും അംഗീകരിക്കുകയും ചെയ്യുന്ന കാര്യത്തിൽ മിർച്ചി എപ്പോഴും മുൻപന്തിയിലുണ്ട്. അവാര്‍ഡുകളും സംഗീതവും നൃത്തവും ചിരിയും നിറഞ്ഞ ഒരു ആഘോഷരാത്രിയാണ് മിർച്ചി കാഴ്ചക്കാർക്കായി ഒരുക്കിയിരുന്നത്. ഈ വർഷം പ്രേക്ഷകർ ഏറ്റവും കൂടുതൽ കാത്തിരുന്ന സംഗീത സായാഹ്നത്തിൽ മലയാള സംഗീത-വിനോദ വ്യവസായത്തിലെ പ്രമുഖ അഭിനേതാക്കളും ഗായകരും അണിനിരന്നു.

Also Read:അഫ്രീദിയ്ക്ക് വ്യക്തിത്വമില്ല കളത്തരങ്ങള്‍ കാണിച്ചു, ഹിന്ദുവായതിനാല്‍ അയാൾ എന്നെ ടീമില്‍ നിന്ന് മാറ്റിനിർത്തി: കനേറിയ

ശ്രുതിമധുരവും ഉജ്ജ്വലവുമായ പ്രകടനങ്ങൾ കൊണ്ട് വേദിയിൽ നിറഞ്ഞു നിന്നത് പ്രശസ്ത പിന്നണി ഗായികമാരായ ശ്വേത മോഹൻ, വിബിൻ സേവ്യർ, വിവേകാനന്ദൻ, അഞ്ജു ജോസഫ് എന്നിവരായിരുന്നു. ശ്വേത മോഹൻ തന്റെ സ്വതസിദ്ധമായ സംഗീതത്തിലൂടെ കാണികളുടെ മനം കവർന്നു. ശ്വേത മോഹന്‍ തന്റെ അമ്മയും പിന്നണി ഗായികയുമായ സുജാതക്ക് വേണ്ടിയൊരുക്കിയ ഹൃദയ സ്പര്‍ശിയായ ഗാനം പ്രേക്ഷകരെ ഈറനണിയിച്ചു.

ലൈഫ് ടൈം അച്ചീവ്‌മെന്റ് അവാർഡ് ലഭിച്ചത് ഗായിക സുജാതയ്ക്ക് ആണ്. സുജാതയ്ക്ക് പുരസ്‌കാരം സമ്മാനിച്ചത് സംവിധായകൻ പ്രിയദർശൻ ആണെന്നതും വേദിയെ മനോഹരമാക്കി. സുജാതയുടെ കരിയറിൽ കൃത്യമായി അടയാളപ്പെടുത്തിയ ‘ചിത്രം’ എന്ന സിനിമ സംവിധാനം ചെയ്ത പ്രിയദർശനിൽ നിന്നും അവാർഡ് ഏറ്റുവാങ്ങാൻ ഗായികയ്ക്ക് സാധിച്ചു. ഈ വർഷത്തെ മികച്ച സംഗീത സംവിധായകനായി മിർച്ചി തിരഞ്ഞെടുത്തത് എം ജയചന്ദ്രനെയാണ്. ഗായകനായി സൂരജ് സന്തോഷിനെ തിരഞ്ഞെടുത്തപ്പോൾ, ഗായികയായി മിർച്ചി തിരഞ്ഞെടുത്തത് കേരളത്തിന്റെ വാനമ്പാടി കെ.എസ് ചിത്രയെ ആണ്.

നടി പൂർണയുടെ ‘തും തും’ എന്ന വൈറൽ ട്രാക്കിലെ മികച്ച പ്രകടനം കാണികളിൽ ഹർഷാരവം ഉണ്ടാക്കി. പ്രശസ്ത ഹാസ്യ നടൻ ബിനു അടിമാലിയുടെ ഹാസ്യ വിരുന്ന് കാഴ്ചക്കാരെ പൊട്ടിച്ചിരിപ്പിച്ചു. ഇതിഹാസ ചലച്ചിത്ര-നാടക സംഗീതസംവിധായകനായ അർജുനൻ മാസ്റ്ററിന് ശ്രീ.ജി.വേണുഗോപാലും ശ്രീ.എം.ജയന്ദ്രനും നൽകിയ ഹൃദയസ്പർശിയായ ആദരാഞ്ജലികൾ പ്രേക്ഷകരെ ഗൃഹാതുര സ്മരണയിലേക്ക് കൊണ്ട് പോയി. സൂരജ് സന്തോഷ്, ജേക്സ് ബിജോയ്, ലേഖ നായർ, അഫ്സൽ യൂസഫ്, സുദീപ് കുമാർ, സംഗീത ശ്രീകാന്ത്, വിനായക് ശശികുമാർ തുടങ്ങി മലയാളി താരങ്ങളുടെയും കലാകാരന്മാരുടെയും സാന്നിധ്യം അവാർഡ് നിശയെ ആകർഷകമാക്കി.

ഇൻഡസ്ട്രിയിലെ അസാമാന്യ പ്രതിഭകളെ ആഘോഷിക്കുന്നതിനായി മിർച്ചി മ്യൂസിക് അവാർഡ് സൗത്തിന്റെ മറ്റൊരു പതിപ്പുമായി മടങ്ങിയെത്തുന്നതിൽ ഞങ്ങൾക്ക് അതിയായ സന്തോഷമുണ്ടെന്ന് പ്രശാന്ത് പാണ്ഡെ പറഞ്ഞു. ‘കഴിഞ്ഞ 12 വർഷമായി, സമാനതകളില്ലാത്ത സംഗീത പ്രതിഭകളെ ആദരിക്കുകയും അംഗീകരിക്കുകയും ചെയ്യുന്ന ഒരു പ്രമുഖ പ്ലാറ്റ്‌ഫോമായി മിർച്ചി മ്യൂസിക് അവാർഡ് സൗത്ത് മാറി കഴിഞ്ഞു. ഓരോ വർഷവും ആകാംക്ഷയോടെ കാത്തിരിക്കുന്ന ഞങ്ങളുടെ കാഴ്ചക്കാർക്ക് ഈ സംഗീത മാമാങ്കം പ്രദർശിപ്പിക്കാൻ ഞങ്ങളും കാത്തിരിക്കുകയാണ്. ഞങ്ങൾ എപ്പോഴും പറയുന്നതു പോലെ, മ്യൂസിക് കോ മിർച്ചി കാ സലാം’, പ്രശാന്ത് പാണ്ഡെ പറഞ്ഞു.

അവാർഡുകൾ ഇങ്ങനെ:

1. ലൈഫ് ടൈം അച്ചീവ്‌മെന്റ് അവാർഡ്- ശ്രീമതി. സുജാത മോഹൻ
2. ഈ വർഷത്തെ ഗാനം:
എ. ചിത്രം: സൂഫിയും സുജാതയും
ബി. ഗാനം: വാത്തികൾ വെള്ളരിപ്രവ്
സി. കമ്പോസർ: എം ജയചന്ദ്രൻ
3. ഈ വർഷത്തെ സംഗീത സംവിധായകൻ: എം ജയചന്ദ്രൻ
4. ആൽബം ഓഫ് ദ ഇയർ: ജസ്റ്റിൻ വർഗീസിന്റെ മ്യാവൂ
5. ഈ വർഷത്തെ പുരുഷ ഗായകൻ: സൂരജ് സന്തോഷ്
6. ഈ വർഷത്തെ വനിതാ ഗായിക: കെ എസ് ചിത്ര
7. ഈ വർഷത്തെ ഗാനരചയിതാവ്: ബി കെ ഹരിനാരായണൻ

എന്റർടൈൻമെന്റ് നെറ്റ്‌വർക്ക് ഇന്ത്യ ലിമിറ്റഡിന്റെ ഉടമസ്ഥതയിലുള്ള മിർച്ചി, 63 നഗരങ്ങളിലായി 73 ഫ്രീക്വൻസികളുമായി ഇന്ത്യയിലെ ഏറ്റവും വലിയ സ്വകാര്യ എഫ്എം റേഡിയോ ബ്രാൻഡ് പ്രവർത്തിപ്പിക്കുന്ന ഒരു റേഡിയോ, വിനോദ കമ്പനിയാണ്. 2001-ൽ സമാരംഭിച്ച മിർച്ചിക്ക് ഇപ്പോൾ അതിന്റെ എഫ്എം, ലൈവ്, ഡിജിറ്റൽ പ്ലാറ്റ്‌ഫോമുകൾക്ക് കീഴിൽ വൈവിധ്യമാർന്ന പ്രോപ്പർട്ടികൾ ഉണ്ട്, ഓരോന്നിനും ബഹുഭാഷാ, മൾട്ടി-പ്ലാറ്റ്‌ഫോം, മൾട്ടി-ഫോർമാറ്റ് ഉള്ളടക്കം എന്നിവയുണ്ട്. സംഗീതവും നൃത്തവും ചിരിയും നിറഞ്ഞ ആഘോഷ രാത്രിയുടെ ദൃശ്യവിരുന്ന് 2022 മെയ് 1 ഞായറാഴ്ച ഏഷ്യാനെറ്റ് പ്ലസ് നിങ്ങളുടെ സ്വീകരണ മുറിയിൽ എത്തിക്കും.