ഉക്രെയ്ൻ പ്രതിസന്ധിയും കോവിഡ് -19 പാൻഡെമിക്കും ആഗോള വിതരണ ശൃംഖലയിൽ പ്രധാനമായ സ്വാധീനം ചെലുത്തിയിട്ടുണ്ടെന്നും ഉക്രെയ്ൻ സംഘർഷം അവസാനിപ്പിക്കാനുള്ള എല്ലാ സമാധാന ശ്രമങ്ങളെയും ഇന്ത്യ പിന്തുണയ്ക്കുന്നുവെന്നും വ്യക്തമാക്കി പ്രധാനമന്ത്രി നരേന്ദ്ര മോദി.
റഷ്യൻ പ്രസിഡന്റ് വ്‌ളാഡിമിർ പുടിൻ ഉൾപ്പെട്ട വ്‌ളാഡിവോസ്‌റ്റോക്കിലെ ഈസ്‌റ്റേൺ ഇക്കണോമിക് ഫോറത്തിന്റെ പ്ലീനറി സെഷനിലെ ഒരു സമ്മേളനത്തെ അഭിസംബോധന ചെയ്തുകൊണ്ട് സംസാരിക്കുകയായിരുന്നു അദ്ദേഹം. ഭക്ഷ്യധാന്യങ്ങൾ, വളങ്ങൾ, ഇന്ധനം എന്നിവയുടെ തുടർച്ചയായ ക്ഷാമം വികസ്വര രാജ്യങ്ങളെ സംബന്ധിച്ചിടത്തോളം വലിയ ആശങ്കയാണെന്നും പ്രധാനമന്ത്രി കൂട്ടിച്ചേർത്തു.
ഉക്രെയ്ൻ സംഘർഷം ആരംഭിച്ചതു മുതൽ, ശത്രുത അവസാനിപ്പിച്ച് ചർച്ചയിലേക്കും നയതന്ത്രത്തിലേക്കും മടങ്ങി പരിഹാരം കാണാൻ നിരന്തരം ആവശ്യപ്പെട്ടിരുന്നതായും റഷ്യൻ, ഉക്രേനിയൻ പ്രസിഡന്റുമാർ തമ്മിൽ നേരിട്ട് ചർച്ച നടത്തണമെന്ന് നിർദ്ദേശിച്ചിരുന്നതായും അദ്ദേഹം പറഞ്ഞു. ഇന്നത്തെ ആഗോളവൽക്കരിക്കപ്പെട്ട ലോകത്ത്, ലോകത്തിന്റെ ഒരു ഭാഗത്ത് നടക്കുന്ന സംഭവങ്ങൾ ലോകത്തെ മുഴുവൻ സ്വാധീനിക്കുന്നതായും മോദി പറഞ്ഞു.
‘ഈ സംഘർഷം അവസാനിപ്പിക്കാനുള്ള എല്ലാ സമാധാന ശ്രമങ്ങളെയും ഞങ്ങൾ പിന്തുണയ്ക്കുന്നു. ഇക്കാര്യത്തിൽ, ധാന്യങ്ങളുടെയും രാസവളങ്ങളുടെയും സുരക്ഷിതമായ കയറ്റുമതിയെക്കുറിച്ചുള്ള സമീപകാല സമവായത്തെയും ഞങ്ങൾ സ്വാഗതം ചെയ്യുന്നു.,’ ഉക്രേനിയൻ ധാന്യങ്ങളുടെ കയറ്റുമതി പുനരാരംഭിക്കുന്നതിനുള്ള യുഎൻ ഇടനിലക്കാരായ കരാറിനെ പരാമർശിച്ച് പ്രധാനമന്ത്രി കൂട്ടിച്ചേർത്തു.
Post Your Comments