മൂന്നാർ: ഇടുക്കിയിൽ കാറിടിച്ചത് ചക്കക്കൊമ്പനെ തന്നെയെന്ന് സ്ഥിരീകരിച്ച് വനംവകുപ്പ്. അപകടത്തിൽ ആനയ്ക്ക് കാര്യമായ പരിക്കേറ്റിട്ടില്ലെന്നാണ് വനംവകുപ്പ് ഉദ്യോഗസ്ഥർ പറയുന്നത്. ആന ഭക്ഷണവും വെള്ളവും കഴിക്കുന്നുണ്ടെന്നും വനം വകുപ്പ് വ്യക്തമാക്കി.
കഴിഞ്ഞ ചൊവ്വാഴ്ച്ച ഇടുക്കി പൂപ്പാറ ചൂണ്ടലിലാണ് സംഭവം. റോഡിലിറങ്ങിയ ആനയെ കാറിടിക്കുകയായിരുന്നു. കൊച്ചി -ധനുഷ്കോടി ദേശീയ പാതയിലാണ് അപകടമുണ്ടായത്. അപകടത്തിൽ കാറിന് കേടു പാട് സംഭവിക്കുകയും യാത്രക്കാർ പരിക്കേൽക്കുകയും ചെയ്തിരുന്നു. കാറിടിച്ചതിന് പിന്നാലെ അക്രമാസക്തനായ കൊമ്പൻ കാറിനു മുകളിലിരുന്നതായും വാഹനം തകർക്കാൻ ശ്രമിച്ചതായും യാത്രക്കാർ പറയുന്നു.
വനം വകുപ്പ് വെറ്ററിനറി ഡോക്റ്ററും ദേവികുളം റേഞ്ച് ഓഫിസറും നേരിട്ട് കണ്ടാണ് ആനയ്ക്ക് പരിക്കില്ലെന്ന് ഉറപ്പാക്കിയിരിക്കുന്നത്. ഒരാഴ്ചത്തേക്ക് ചക്കക്കൊമ്പനെ നിരീക്ഷിക്കാനായി പ്രത്യേക സംഘത്തെയും നിയോഗിച്ചിട്ടുണ്ട്.
Post Your Comments