കോൺഗ്രസ് ഭരണത്തിന്റെ തെറ്റായ നയങ്ങൾ കാരണം വടക്കുകിഴക്കൻ സംസ്ഥാനങ്ങളിലെ തർക്കങ്ങൾ പരിഹരിക്കപ്പെടാതെ കിടക്കുന്നു: ശർമ്മ

മണിപ്പൂരിലെ നിലവിലെ വംശീയ സംഘർഷങ്ങൾക്ക് കാരണം കഴിഞ്ഞ കോൺഗ്രസ് സർക്കാരുകളാണെന്ന് അസം മുഖ്യമന്ത്രി ഹിമന്ത ബിശ്വ ശർമ്മ. പാർലമെന്റിന്റെ മൺസൂൺ സമ്മേളനത്തിൽ മണിപ്പൂർ വിഷയം പ്രതിപക്ഷം ആളിക്കത്തിക്കുന്നതിനിടെയാണ് ഹിമന്തയുടെ ആരോപണം. കോൺഗ്രസ് സാമുദായിക അസ്വാരസ്യം പരത്തിക്കൊണ്ട് ഭരിക്കുകയാണെന്ന് ആരോപിച്ച ഹിമന്ത, മണിപ്പൂരിലെ സംഘർഷങ്ങൾക്ക് കാരണം നിക്ഷിപ്ത താൽപ്പര്യത്തോടെ അന്ന് രാജ്യം ഭരിച്ചിരുന്ന കോൺഗ്രസ് പാർട്ടിയാണെന്നും പറഞ്ഞു.

‘മണിപ്പൂരിൽ നടക്കുന്ന അക്രമങ്ങൾ ചൂണ്ടിക്കാട്ടി കോൺഗ്രസ് ഇന്ന് പാർലമെന്റിൽ അവിശ്വാസ പ്രമേയം കൊണ്ടുവന്നു. എന്നാൽ 1990ൽ സംസ്ഥാനത്ത് നടന്ന വർഗീയ സംഘർഷങ്ങളിൽ 300 പേരും 2006ൽ 105 പേരും കൊല്ലപ്പെട്ടത് കോൺഗ്രസ് ഭരണത്തിന് കീഴിലാണെന്ന് കണക്കുകൾ സൂചിപ്പിക്കുന്നു,’ ഹിമന്ത പറഞ്ഞു. കോൺഗ്രസ് ഭരണത്തിന്റെ തെറ്റായ നയങ്ങൾ കാരണം വടക്കുകിഴക്കൻ സംസ്ഥാനങ്ങളിലെ വിവിധ തർക്കങ്ങൾ പരിഹരിക്കപ്പെടാതെ കിടക്കുന്നുവെന്നും അദ്ദേഹം കൂട്ടിച്ചേർത്തു.

2008ലെ വംശീയ സംഘർഷത്തിനിടെ മുൻ പ്രധാനമന്ത്രി മൻമോഹൻ സിംഗ് അസമിലെ കൊക്രജാർ ജില്ല സന്ദർശിച്ചുവെന്ന കോൺഗ്രസിന്റെ അവകാശവാദത്തെ എതിർത്ത ഹിമന്ത, അദ്ദേഹം ആ കാലയളവിൽ ഒരിക്കലും സംസ്ഥാനം സന്ദർശിച്ചിട്ടില്ലെന്ന് തിരിച്ചടിച്ചു.

‘നാഗാലാൻഡായാലും മണിപ്പൂരായാലും, രക്തച്ചൊരിച്ചിലിലേക്ക് നയിക്കുന്ന വ്യാപകമായ അക്രമങ്ങൾക്ക് ആക്കം കൂട്ടുന്നതിന്റെ റെക്കോർഡ് കോൺഗ്രസിനുണ്ട്. 1962-ലെ ഇന്ത്യ-ചൈന യുദ്ധത്തിൽ ഇന്ദിരാഗാന്ധി അസം സന്ദർശിച്ചപ്പോൾ, ചൈനീസ് സൈന്യം തട്ടിക്കൊണ്ടുപോകുമെന്ന് ഭയന്ന് സംസ്ഥാനം സന്ദർശിക്കരുതെന്ന് ജവഹർലാൽ നെഹ്‌റു അവർക്ക് മുന്നറിയിപ്പ് നൽകിയിരുന്നു,’- അദ്ദേഹം പറഞ്ഞു.

മണിപ്പൂരിലെ പ്രധാനമന്ത്രി നരേന്ദ്രമോദിയുടെ മൗനം ഭേദിക്കാൻ സർക്കാരിനെതിരെ അവിശ്വാസ പ്രമേയം കൊണ്ടുവരാൻ പ്രതിപക്ഷ സംഘം ‘ഇന്ത്യ’ നിർബന്ധിതരായെന്ന കോൺഗ്രസ് എംപി ഗൗരവ് ഗൊഗോയ് ചൊവ്വാഴ്ച പറഞ്ഞതിന് പിന്നാലെയാണ് ഹിമന്തയുടെ പ്രസ്താവന .