കേരളത്തിൽ ഇലക്ട്രിക് വാഹനങ്ങൾക്ക് പ്രിയമേറുന്നു, വിൽപ്പനയിൽ റെക്കോർഡ് വർദ്ധനവ്

കേരളത്തിൽ ഇലക്ട്രിക് വാഹനങ്ങളുടെ വിൽപ്പനയിൽ റെക്കോർഡ് മുന്നേറ്റം. ഏറ്റവും പുതിയ കണക്കുകൾ പ്രകാരം, ഈ വർഷം ഇതുവരെ ഇ-വാഹന വിൽപ്പനയിൽ 13.66 ശതമാനത്തിന്റെ വർദ്ധനവാണ് രേഖപ്പെടുത്തിയത്. ഇതോടെ, ഇ-വാഹന രജിസ്ട്രേഷനുകളുടെ എണ്ണം ഒരു ലക്ഷം പിന്നിട്ടിരിക്കുകയാണ്. കഴിഞ്ഞ വർഷം ഇത് 6.28 ശതമാനം ആയിരുന്നു. ഇ-വാഹനങ്ങൾക്ക് മാത്രമായി വൻ വിപണികൾ ഉള്ള മറ്റ് സംസ്ഥാനങ്ങളെ പിന്നിലാക്കിയാണ് കേരളത്തിന്റെ കുതിപ്പ്. കേരളത്തിൽ പെട്രോൾ വാഹന വിൽപ്പന ഒന്നാമതും, ഇ-വാഹന വിൽപ്പന രണ്ടാമതും എത്തിയിരിക്കുകയാണ്.

സർക്കാർ സബ്സിഡിയും ഇന്ധന വില വർദ്ധനവും കൂടുതൽ ആളുകളെ ഇ-വാഹന മേഖലയിലേക്ക് ആകർഷിക്കാൻ കാരണമായിട്ടുണ്ട്. 2022-ൽ 39,588 ഇ-വാഹനങ്ങളാണ് നിരത്തിലിറങ്ങിയത്. എന്നാൽ, ഈ വർഷം വെറും ആറ് മാസം കൊണ്ട് 35,072 ഇ-വാഹനങ്ങൾ നിരത്തിൽ എത്തിയിട്ടുണ്ട്. ഈ വർഷം അവസാനിക്കാൻ ഇനിയും മാസങ്ങൾ ബാക്കി നിൽക്കെ, ഇ-വാഹന വിൽപ്പന വീണ്ടും ഉയരുമെന്നാണ് വിലയിരുത്തൽ.

Also Read: നിരവധി കേസുകളിൽ പ്രതി: യുവാവിനെ കാപ്പ ചുമത്തി ജയിലിലടച്ചു

ഈ വർഷം നിരത്തുകളിൽ എത്തിയതിൽ കൂടുതലും ഇരുചക്ര വാഹനങ്ങളാണ്. 22,634 ഇരുചക്ര വാഹനങ്ങളാണ് കഴിഞ്ഞ ആറ് മാസത്തിനിടെ വിറ്റത്. കൂടാതെ, സ്മാർട്ട് സിറ്റി പദ്ധതിയിൽ ഉൾപ്പെടുത്തി തലസ്ഥാനത്ത് ഇലക്ട്രിക് ബസുകളും നിരത്തുകൾ കീഴടക്കാൻ എത്തിയിട്ടുണ്ട്. ചാർജിംഗ് സ്റ്റേഷനുകളുടെ അഭാവമാണ് കേരളത്തിലെ ഇ-വാഹന വിപണി നേരിടുന്ന പ്രധാന വെല്ലുവിളി. സംസ്ഥാനത്താകെ വൈദ്യുത തൂണുകളിൽ ചാർജർ സംവിധാനം ഒരുക്കാനുള്ള നീക്കത്തിലാണ് കെഎസ്ഇബി.