ഇസ്രായേൽ-ഹമാസ് യുദ്ധം രൂക്ഷമാകുമ്പോൾ യഹൂദവിരുദ്ധതർക്ക് മുന്നറിയിപ്പ് നൽകി ഋഷി സുനക്

മിഡിൽ ഈസ്റ്റിലെ പലസ്തീൻ തീവ്രവാദ സംഘടനയായ ഹമാസും ഇസ്രായേലും തമ്മിലുള്ള യുദ്ധം രൂക്ഷമായിരിക്കെ, രാജ്യത്ത് താമസിക്കുന്ന ബ്രിട്ടീഷ് ജൂത സമൂഹത്തെ സംരക്ഷിക്കുമെന്ന് യുകെ പ്രധാനമന്ത്രി ഋഷി സുനക്. ബ്രിട്ടനിൽ കലാപം സൃഷ്ടിക്കരുതെന്ന് സംഘർഷം ഇളക്കിവിടാൻ ശ്രമിക്കുന്നവർക്ക് അദ്ദേഹം മുന്നറിയിപ്പ് നൽകി. കഴിഞ്ഞ വാരാന്ത്യത്തിൽ ഇസ്രയേലിനെതിരെ ഹമാസ് നടത്തിയ ആക്രമണത്തിന് ശേഷം യഹൂദവിരുദ്ധ സംഭവങ്ങളിൽ വെറുപ്പുളവാക്കുന്ന രീതിയിൽ വർധനയുണ്ടായതായി നേരത്തെ ബ്രിട്ടീഷ് പ്രധാനമന്ത്രി സുനക് പറഞ്ഞിരുന്നു.

‘ബ്രിട്ടീഷ് ജൂത സമൂഹമേ, ഞാൻ നിങ്ങളോടൊപ്പം നിൽക്കുന്നു. നിങ്ങളെ സംരക്ഷിക്കാൻ സാധ്യമായതെല്ലാം ഞാൻ ചെയ്യും. ഭയപ്പെടുത്തുന്ന പെരുമാറ്റത്തിലൂടെയും ലജ്ജാകരമായ യഹൂദ വിരോധത്തിലൂടെയും ഓൺലൈനിലും ഞങ്ങളുടെ തെരുവുകളിലും പിരിമുറുക്കം സൃഷ്ടിക്കാൻ ശ്രമിക്കുന്നവരോട് എനിക്ക് പറയാനുള്ളത്, ‘അത് ഇവിടെ നടക്കില്ല’, സുനക് എക്‌സിൽ എഴുതി.

അതേസമയം, ഇസ്രായേലും ഹമാസും തമ്മിലുള്ള യുദ്ധം അതിന്റെ ഏഴാം ദിവസത്തിലേക്ക് കടന്നിരിക്കുകയാണ്. ഗാസ മുനമ്പിൽ വ്യോമ, കര, നാവിക സേനകളെ ഉൾപ്പെടുത്തി ‘ഏകീകൃത’ ആക്രമണത്തിന് തയ്യാറാണെന്ന് ഇസ്രായേൽ പ്രതിരോധ സേന (ഐഡിഎഫ്) അറിയിച്ചു. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു ഗാസ അതിർത്തിക്ക് സമീപം സൈനികരുമായി കൂടിക്കാഴ്ച നടത്തിയതിന് പിന്നാലെയാണ് സൈന്യത്തിന്റെ പ്രസ്താവന.