റെയിൽ ഗതാഗത രംഗത്ത് വീണ്ടും വിപ്ലവം! സാധാരണക്കാർക്കായുള്ള ആദ്യ പുഷ്-പുൾ ട്രെയിൻ ഈ മാസം എത്തും

റെയിൽ ഗതാഗത രംഗത്ത് വീണ്ടും ചരിത്രം സൃഷ്ടിക്കാൻ രാജ്യത്തെ ആദ്യ പുഷ്-പുൾ ട്രെയിൻ എത്തുന്നു. സാധാരണക്കാരിലേക്കും അത്യാധുനിക സംവിധാനങ്ങളും സൗകര്യങ്ങളും അടങ്ങിയ ട്രെയിനുകൾ എത്തിക്കുക എന്ന ലക്ഷ്യത്തിന്റെ ഭാഗമായാണ് പുഷ്-പുൾ ട്രെയിനുകൾ രൂപകൽപ്പന ചെയ്തത്. ഈ നോൺ എസി വന്ദേ ഭാരത് ട്രെയിനുകൾ ഉടൻ തന്നെ സർവീസ് ആരംഭിക്കുമെന്ന് റെയിൽവേ വ്യക്തമാക്കി. പുഷ്-പുൾ മാതൃകയായതിനാൽ ട്രെയിനുകൾക്ക് കൂടുതൽ വേഗത കൈവരിക്കാൻ കഴിയും.

ഐസിഎഫിൽ നിർമ്മിച്ച ആദ്യ പുഷ്-പുൾ ട്രെയിൻ ഒക്ടോബർ 23ന് പുറത്തിറക്കുന്നതാണ്. സെൻട്രൽ സോണിലെ ഇഗത്പുരി സെക്ഷനിലാണ് ഈ ട്രെയിനിന്റെ ട്രയൽ റൺ നടക്കുക. രണ്ടാമത്തെ ട്രെയിൻ ഒക്ടോബർ 30-നും പുറത്തിറക്കും. അഹമ്മദാബാദിനും മുംബൈയ്ക്കും ഇടയിലാണ് ഈ ട്രെയിൻ ട്രയൽ റൺ നടത്തുക. 22 കോച്ചുകളാണ് നോൺ എസി പുഷ്-പുൾ ട്രെയിനിൽ ഉള്ളത്. 12 എണ്ണം സ്ലീപ്പർ, 8 എണ്ണം റിസർവ്ഡ്, 2 ലഗേജ് വാനുകൾ എന്നിങ്ങനെ 1,834 ബർത്തുകളും സീറ്റുകളും ഉണ്ടായിരിക്കും.

Also Read: ഇടയ്ക്കിടെ ബാത്ത്റൂമിൽ പോകേണ്ടതായി വരുന്നുണ്ടോ? ഇക്കാര്യം ശ്രദ്ധിക്കണം

ആദ്യ ഘട്ടത്തിൽ പട്ന, മുംബൈ എന്നിവിടങ്ങളിലാണ് പുഷ്-പുൾ ട്രെയിനുകൾ സർവീസ് നടത്താൻ സാധ്യത. ഇതിനുപുറമേ, ഒരു ട്രെയിൻ ദക്ഷിണേന്ത്യേയ്ക്കും അനുവദിച്ചേക്കുമെന്നാണ് സൂചന. സിസിടിവി നിരീക്ഷണ സംവിധാനം, പാസഞ്ചർ ഇൻഫർമേഷൻ സിസ്റ്റം, ഇലക്ട്രോണിക് ഡെസ്റ്റിനേഷൻ ബോർഡ്, ഓരോ സീറ്റിലും മൊബൈൽ ചാർജിംഗ് പോയിന്റ് തുടങ്ങിയ അത്യാധുനിക സൗകര്യങ്ങൾ ട്രെയിനിൽ സജ്ജമാക്കിയിട്ടുണ്ട്.