ശ്രീകണ്ഠപുരം: കെ.എസ്.ആര്‍.ടി.സി കണ്ടക്ടറെ വധിക്കാന്‍ ശ്രമിച്ച കേസിലെ പ്രതി 10 വര്‍ഷത്തിന് ശേഷം അറസ്റ്റിൽ. ഇടുക്കി വാരിക്കുഴി ചോപ്രാംകുടിയിലെ ചെന്നങ്കോട്ടി റെജി ഗോപി (49) ആണ് പിടിയിലായത്.
Read Also : കളമശ്ശേരിയിലുണ്ടായത് ഉഗ്രസ്‌ഫോടനം, കൊല്ലപ്പെട്ടത് സ്ത്രീയാണെന്ന് വിവരം, ഒന്നിലേറെ തവണ പൊട്ടിത്തെറി ഉണ്ടായി
2013 ഒക്‌ടോബര്‍ 28-നായിരുന്നു കേസിനാസ്പദമായ സംഭവം നടന്നത്. ഇതേ തീയതിയില്‍ തന്നെയാണ് 10 വര്‍ഷത്തിന് ശേഷം പ്രതി പിടിയിലായത്. തളിപ്പറമ്പില്‍ നിന്ന് പയ്യാവൂരിലേക്ക് ബസില്‍ കയറിയ റെജിയോട് ടിക്കറ്റെടുക്കാന്‍ ആവശ്യപ്പെട്ടപ്പോള്‍ കണ്ടക്ടറെ ആക്രമിക്കുകയായിരുന്നു. പിന്നീട് ഒളിവില്‍ പോയ റെജി ഗോപി മുണ്ടക്കയത്തുണ്ടെന്ന സൂചനയെത്തുടര്‍ന്ന് രണ്ട് ദിവസം മുമ്പ് പയ്യാവൂര്‍ പൊലീസ് അവിടെയെത്തുകയായിരുന്നു. നിരീക്ഷണത്തിനൊടുവില്‍ പൊലീസ് കണ്ടെത്തിയതോടെ റെജി ഓടിരക്ഷപ്പെടാന്‍ ശ്രമിച്ചു. തുടർന്ന്, പൊലീസ് പിടികൂടുകയായിരുന്നു.
എസ്.ഐ കെ. ഷറഫുദ്ദീൻ, സീനിയര്‍ സി.പി.ഒമാരായ പ്രമോജ്കുമാര്‍, അനീഷ്‌കുമാര്‍, ഡ്രൈവര്‍ രാഹുല്‍ എന്നിവരടങ്ങിയ സംഘമാണ് പിടികൂടിയത്. പ്രതിയെ കോടതിയിൽ ഹാജരാക്കി.
Post Your Comments