തായ്‌വാൻ ഭൂചലനം: ദേശീയ ഉദ്യാനത്തിലേക്ക് ബസില്‍ പോയ 50 പേരെ കാണാനില്ല

ഒന്‍പതുപേര്‍ മരിച്ച തയ്‌വാന്‍ ഭൂചലനത്തില്‍ ആയിരത്തിലേറെപ്പേര്‍ക്ക് പരുക്കേറ്റതായി സ്ഥിരീകരണം. തരോകോ ദേശീയ ഉദ്യാനത്തിലേക്ക് ബസില്‍ പോയിരുന്ന 50 ജീവനക്കാരെ ഇപ്പോഴും കണ്ടെത്താനായിട്ടില്ല. നിരവധി കെട്ടിടങ്ങളാണ് ഭൂചലനത്തിൽ നിലംപൊത്തിയത്. രക്ഷാപ്രവർത്തനം ഇപ്പോഴും തുടരുന്നു. 25 വര്‍ഷത്തിനിടെയുണ്ടായ ഏറ്റവും ശക്തമായ ഭൂചലനം തയ്‌വാനെ പിടിച്ചുലച്ചു. റിക്ടര്‍ സ്കെയിലിൽ 7.5 തീവ്രത രേഖപ്പെടുത്തിയ ഭൂചലനത്തിൽ ആകെ 9 പേർ മരണപ്പെട്ടു.

പതിറ്റാണ്ടുകൾക്ക് ശേഷം ദ്വീപിനെ കുലുക്കിയ ഏറ്റവും ശക്തമായ ഭൂചലനമാണിതെന്നും വരും ദിവസങ്ങളിൽ കൂടുതൽ ഭൂചലനങ്ങൾ ഉണ്ടാകുമെന്നും അധികൃതർ മുന്നറിയിപ്പ് നൽകി. രണ്ട് ടെക്‌റ്റോണിക് പ്ലേറ്റുകളുടെ ജംഗ്‌ഷനു സമീപം സ്ഥിതി ചെയ്യുന്നതിനാൽ പതിവായി ഭൂകമ്പങ്ങൾ ഉണ്ടാകുന്ന ദ്വീപിൻ്റെ കർശനമായ കെട്ടിട നിയന്ത്രണങ്ങളും ദുരന്ത ബോധവൽക്കരണവും ഒരു വലിയ വിപത്ത് ഒഴിവാക്കി. ദ്വീപിൻ്റെ ചരിത്രത്തിലെ ഏറ്റവും മാരകമായ പ്രകൃതിദുരന്തം 1999 സെപ്തംബറിൽ ആയിരുന്നു. അന്ന് 7.6 തീവ്രത രേഖപ്പെടുത്തിയതിന് ശേഷമുള്ള ഏറ്റവും ശക്തമായ ഭൂചലനമാണിതെന്ന് ഉദ്യോഗസ്ഥർ പറഞ്ഞു. 25 വർഷങ്ങൾക്ക് മുൻപുണ്ടായ ഭൂചലനത്തിൽ 2,400 ഓളം പേർ കൊല്ലപ്പെട്ടിരുന്നു.

ഹൗളിയൻ സിറ്റിയിൽ നിന്നും 18 കിലോമീറ്റർ തെക്കു മാറി 34.8 കിലോമീറ്റർ ആഴത്തിലാണ് ഭൂചലനത്തിന്റെ പ്രഭവ കേന്ദ്രമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. നഗരത്തെ ചുറ്റിപ്പറ്റിയുള്ള കുന്നുകൾക്കിടയിലൂടെ അതിരാവിലെ കാൽനടയാത്ര നടത്തുകയായിരുന്ന ഏഴംഗ സംഘത്തിലെ മൂന്ന് പേർ ഭൂകമ്പത്തിൽ പൊട്ടിയ പാറക്കല്ലുകൾ തലയിൽ വീണ് മരണപ്പെടുകയായിരുന്നു. മറ്റൊരിടത്ത് തുരങ്കത്തിനടുത്തെത്തിയപ്പോൾ മണ്ണിടിച്ചിലിൽ ഒരു ട്രക്ക് ഡ്രൈവർ മരിച്ചു. ഭൂകമ്പം ഉണ്ടായപ്പോൾ ആടിയുലയുന്ന കെട്ടിടങ്ങളുടെ രാജ്യത്തുടനീളമുള്ള വീഡിയോകളും ചിത്രങ്ങളും സോഷ്യൽ മീഡിയകളിൽ നിറയുന്നുണ്ട്. ന്യൂ തായ്‌പേയ് സിറ്റിയിലെ ഒരു വെയർഹൗസ് ഭൂചലനത്തിൽ തകർന്നു. മണ്ണിടിച്ചിലിനെത്തുടർന്ന് 100,000 ആളുകളുള്ള പർവത വളയങ്ങളുള്ള തീരദേശ നഗരമായ ഹുവാലിയനിലേക്കുള്ള റോഡുകളിൽ പാറകൾ കുന്നുകൂടി.