ന്യൂഡല്‍ഹി: ഡോക ലായിലേക്ക് ഇന്ത്യ കൂടുതല്‍ സൈന്യത്തെ അയച്ചതായി റിപ്പോര്‍ട്ട്. ചൈനയുമായി സംഘര്‍ഷം നിലനില്‍ക്കുന്ന സിക്കിം അതിര്‍ത്തിയിലെ പ്രദേശമാണ് ഡോക ലാ. വിവിധ വാർത്താ ഏജൻസികളാണ് ഇക്കാര്യം റിപ്പോര്‍ട്ട് ചെയ്തത്. സിക്കിം, അരുണാചല്‍പ്രദേശ് മേഖലയിലെ സംഘര്‍ഘ സാധ്യത കണക്കിലെടുത്താണ് നടപടിയെന്നു കരുതപ്പെടുന്നത്.
വാർത്തയെക്കുറിച്ച് സൈനികവൃത്തങ്ങള്‍ ഒൗദ്യോഗികമായി പ്രതികരിച്ചിട്ടില്ല. ഓപ്പറേഷന്‍റെ വിശദാംശങ്ങള്‍ വെളിപ്പെടുത്താന്‍ കഴിയില്ലെന്ന് പ്രതികരണത്തിനായി സമീപിച്ച വാര്‍ത്താ ഏജന്‍സികളോട് സൈനിക വൃത്തങ്ങള്‍ അറിയിച്ചു.സിക്കിം, അരുണാചല്‍പ്രദേശ് മേഖലയിലെ സൈനികര്‍ക്കു പിന്തുണ നല്‍കുന്ന നിർണായക നീക്കമാണ് സെെന്യം നടത്തുന്നത്. വാര്‍ഷിക പരിശീലനത്തിന്‍റെ ഭാഗമായി കൂടുതല്‍ സൈനികരെ അയയ്ക്കുന്നുണ്ടെന്ന് സൈന്യം കഴിഞ്ഞദിവസം ഒൗദ്യോഗികമായി അറിയിച്ചിരുന്നു.
മൂന്നുമാസമായി തുടരുന്ന സംഘര്‍ഷാവസ്ഥയില്‍നിന്ന് ഇരുരാജ്യങ്ങളും പിന്‍മാറാന്‍ തയാറല്ലെന്ന് ഇതോടെ വ്യക്തമായി. ജൂണ്‍ 16നു സിക്കിം അതിര്‍ത്തിയോടു ചേര്‍ന്ന ഡോക ലായില്‍ ചൈനീസ് സൈന്യം റോഡ് നിര്‍മിക്കുന്നത് ഇന്ത്യ തടഞ്ഞതോടെയാണ് മേഖലയില്‍ സംഘര്‍ഷം ആരംഭിച്ചത്. ഭൂട്ടാന്‍റെ പ്രദേശത്തെ അനധികൃത നിര്‍മാണം തടയാന്‍ ഇന്ത്യന്‍ സേന അവിടേക്കു ചെല്ലുകയായിരുന്നു.
Post Your Comments