ഗാന്ധിനഗര്‍: വധശിക്ഷയ്ക്കു വിധിക്കപ്പെട്ടു പാക്കിസ്ഥാനില്‍ ജയിലില്‍ കഴിയുന്ന കുല്‍ഭൂഷണ്‍ ജാദവും ഭാര്യയും തമ്മിലുള്ള കൂടിക്കാഴ്ച അദ്ദേഹത്തിന്റെ ധാര്‍മിക ധീരത വര്‍ധിപ്പിക്കുമെന്ന് പ്രതിരോധമന്ത്രി നിര്‍മല സീതാരാമന്‍. കുല്‍ഭൂഷന്‍ ജാദവും ഭാര്യയും തമ്മിലുള്ള കൂടിക്കാഴ്ചക്ക് നടപടി ക്രമങ്ങള്‍ പൂര്‍ത്തിയാക്കാനുണ്ട്. ജാദവിനെ ഇന്ത്യയില്‍ തിരികെ എത്തിക്കുന്നതിന് ആവശ്യമായതെല്ലാം ചെയ്യുമെന്നും നിര്‍മല സീതാരാമന്‍ പറഞ്ഞു. പാക്കിസ്ഥാനില്‍ ജയിലില്‍ കഴിയുന്ന കുല്‍ഭൂഷണ്‍ ജാദവിനെ സന്ദര്‍ശിക്കാന്‍ അദ്ദേഹത്തിന്റെ ഭാര്യക്ക് പാക്കിസ്ഥാന്‍ അനുമതി നല്‍കിയിരുന്നു. മാനുഷിക പരിഗണനയുടെ പേരിലാണ് അനുമതിയെന്നും പാക് വിദേശകാര്യ മന്ത്രാലയം അറിയിച്ചിരുന്നു.
ഇന്ത്യന്‍ രഹസ്യ അന്വേഷണ വിഭാഗമായ റോയുടെ ചാരന്‍ എന്നാരോപിച്ചാണ് കഴിഞ്ഞവര്‍ഷം മാര്‍ച്ചില്‍ പാക് പ്രവിശ്യയായ ബലൂചിസ്ഥാനിലെ മഷ്കലില്‍നിന്ന് ജാദവിനെ പാക്കിസ്ഥാന്‍ പിടികൂടിയത്. . ഇന്ത്യയുടെ വിദേശചാരസംഘടനയായ റോ (റിസര്‍ച്ച്‌ ആന്‍ഡ് അനാലിസിസ് വിംഗ്)യുടെ ഏജന്‍റായി ജാദവ് ബലൂചിസ്ഥാനില്‍ കലാപം ഉണ്ടാക്കാന്‍ ശ്രമിക്കുകയായിരുന്നു എന്നായിരുന്നു പാകിസ്ഥാന്റെ ആരോപണം.
Post Your Comments