സഹപാഠികളുടെ കളിയാക്കലിന് ഇരയായ ക്വാഡന്‍ ബെയില്‍സിന് പിന്തുണയുമായി ഹോളിവുഡ് താരങ്ങള്‍

ഓസ്ട്രേലിയ: സഹപാഠികളുടെ കളിയാക്കലിന് ഇരയായ ക്വാഡന്‍ എന്ന ഒമ്പത്കാരന്‍ തന്നെ ഒന്ന് കൊന്നു തരുമോ എന്ന് ആവശ്യപ്പെടുന്ന വീഡിയോ എല്ലാവരുടെയും കണ്ണു നനയിച്ചിരുന്നു. നിരവധിപേര്‍ ക്വാഡന് പിന്തുണയുമായി രംഗത്തെത്തുകയും ചെയ്തിരുന്നു. ഇപ്പോള്‍ ക്വാഡന്‍ ബെയില്‍സിന് പിന്തുണയുമായി രംഗത്തെത്തിയിരിക്കുകയാണ് ഹോളിവുഡ് താരങ്ങള്‍.

ഉയരക്കുറവിന്റെ പേരില്‍ കൂട്ടുകാര്‍ കളിയാക്കിയതില്‍ വിഷമിച്ച് കരഞ്ഞ ക്വാഡന്റെ വീഡിയോ നേരത്തെ വൈറലായിരുന്നു. പൊക്കക്കുറവിന്റെ പേരില്‍ മുന്‍പ് അവഗണനകള്‍ നേരിട്ട ഹോളിവുഡ് കൊമേഡിയനായ ബ്രാഡ് വില്യംസും ക്വാഡന് പിന്തുണയറിയിച്ചു. ക്വാഡനെയും അമ്മയെയും കാലിഫോര്‍ണിയയിലെ ഡിസ്നി ലാന്‍ഡ് സന്ദര്‍ശനത്തിനയക്കാന്‍ വേണ്ടി 10000 ഡോളര്‍ തന്റെ സംഘടനയിലൂടെ സ്വരൂപിക്കുന്നതായി ബ്രാഡ് വില്യംസ് വ്യക്തമാക്കി.

This makes me sick. I’ve been trying to get in touch with this family. If any of my Austrialian fans know this family. Please tell this wonderful boy that he has me and an army of friends all over the world that support him.
https://t.co/C860H7kfkS

— Brad Williams (@funnybrad) February 20, 2020

ഹോളിവുഡ് താരം ഹ്യൂജ് ജാക്ക്മാനും ട്വിറ്ററില്‍ പങ്കു വെച്ച വീഡിയയോയിലൂടെ ക്വാഡന് പിന്തുണ അറിയിച്ചുകൊണ്ട് രംഗത്തെത്തിയിട്ടുണ്ട്. നിനക്ക് എന്നില്‍ ഒരു സുഹൃത്തിനെ ലഭിച്ചിരിക്കുന്നു എന്ന കുറിപ്പോടെയാണ് ഹ്യൂജ് വീഡിയോ പങ്കുവച്ചിരിക്കുന്നത്. ക്വാഡന്‍, നീ വിചാരിക്കുന്നതിനേക്കാള്‍ കരുത്തനാണ്.എല്ലാവരും പരസ്പരം അനുകമ്പ കാണിക്കുക. കളിയാക്കലുകള്‍ ശരിയല്ല,ജീവിതം കാഠിന്യമേറിയതാണ്. നമുക്കോര്‍ക്കാം, നമുക്ക് മുന്‍പിലുള്ള എല്ലാവരും എന്തെങ്കിലും പ്രശ്നങ്ങളെ അഭിമുഖീകരിക്കുന്നവരാണ്,’ എന്നാണ് വീഡിയോയില്‍ ഹ്യൂജ് ജാക്ക്മാന്‍ പറയുന്നത്.

Quaden – you’ve got a friend in me. #BeKind @LokelaniHiga https://t.co/8dr3j2z8Sy pic.twitter.com/jyqtZYC953

— Hugh Jackman (@RealHughJackman) February 20, 2020

പൊക്കക്കുറവിന്റെ പേരില്‍ കൂട്ടുകാര്‍ പരിഹസിക്കുന്നുവെന്ന് പറഞ്ഞ് പൊട്ടിക്കരഞ്ഞ ക്വാഡന്‍ ബെയില്‍സ് എന്ന ഓസ്ട്രേലിയന്‍ സ്വദേശിയായ കുട്ടിയുടെ വീഡിയോ സോഷ്യല്‍ മീഡിയ ഏറ്റെടുത്തിരുന്നു. പരിഹാസം കേട്ട് മടുത്ത തന്നെ ആരെങ്കിലുമൊന്ന് കൊന്നുതരാമോ എന്നാണ് വീഡിയോയില്‍ അമ്മയോട് ക്വാഡന്‍ ചോദിക്കുന്നത്. ക്വാഡന്റെ അമ്മ യാറക ബെയില്‍സ് തന്നെയാണ് ഈ വീഡിയോ സോഷ്യല്‍ മീഡിയയിലൂടെ പങ്കുവച്ചത്. ഇതിനോടകം തന്നെ 15 മില്യണിലധികം ആളുകള്‍ ഈ വീഡിയോ കണ്ടുകഴിഞ്ഞു.