മുന്ന്​ വട്ടം ആത്മഹത്യയെ പറ്റി ചിന്തിച്ചിരുന്നതായി ഇന്ത്യന്‍ ക്രിക്കറ്റ് താരത്തിന്റെ വെളിപ്പെടുത്തല്‍

ന്യൂഡല്‍ഹി • ഏതാനും വർഷങ്ങൾക്കുമുമ്പ് വ്യക്തിപരമായ പ്രശ്‌നങ്ങള്‍ മൂലം മൂന്ന് തവണ ആത്മഹത്യ ചെയ്യാൻ ആലോചിച്ചുവെന്ന വെളിപ്പെടുത്തലുമായി ഇന്ത്യന്‍ ക്രിക്കറ്റ് താരം മൊഹമ്മദ്‌ ഷമി. ഇത് കുടുംബാംഗങ്ങളെ എല്ലായ്‌പ്പോഴും തന്നെ നിരീക്ഷിക്കാൻ നിര്‍ബന്ധിതമാക്കിയെന്നും അദ്ദേഹം പറഞ്ഞു.

24-ാം നിലയിലെ അപ്പാർട്ട്മെന്റിൽ നിന്ന് താൻ ചാടുമെന്ന് കുടുംബാംഗങ്ങൾ ഭയപ്പെട്ടിരുന്നതായും അദ്ദേഹം പറഞ്ഞു. സഹതാരം രോഹിത്​ ശര്‍മയുമായി നടത്തിയ ഇന്‍സ്​റ്റഗ്രാം ചാറ്റ്​ ഷോയിലാണ്​ ഇന്ത്യയുടെ പ്രമുഖ ബൗളര്‍മാരില്‍ ഒരാളായ ഷമി തന്റെ വ്യക്തിപരവും ഔദ്യോഗികവുമായ ജീവിതം തുറന്നുകാട്ടിയത്.

“എന്റെ കുടുംബം എന്നെ പിന്തുണച്ചിരുന്നില്ലെങ്കിൽ എനിക്ക് ക്രിക്കറ്റ് നഷ്ടപ്പെടുമായിരുന്നു. കടുത്ത സമ്മർദ്ദവും വ്യക്തിപരമായ പ്രശ്നങ്ങളും കാരണം ആ കാലയളവിൽ മൂന്ന് തവണ ആത്മഹത്യ ചെയ്യാൻ ഞാൻ ആഗ്രഹിച്ചു,” ഷമി വെളിപ്പെടുത്തി.

“ഞാൻ ക്രിക്കറ്റിനെക്കുറിച്ച് ഒട്ടും ചിന്തിച്ചിരുന്നില്ല. ഞങ്ങൾ 24 ആം നിലയിലാണ് താമസിച്ചിരുന്നത്. ഞാൻ ബാൽക്കണിയിൽ നിന്ന് ചാടുമെന്ന് അവർ (കുടുംബം) ഭയപ്പെട്ടു. എന്റെ സഹോദരൻ എന്നെ വളരെയധികം പിന്തുണച്ചു.എന്റെ 2-3 സുഹൃത്തുക്കൾ എന്നോടൊപ്പം 24 മണിക്കൂർ താമസിക്കാറുണ്ടായിരുന്നു. ആ ഘട്ടത്തിൽ നിന്ന് കരകയറാനും മറ്റെന്തിനെക്കുറിച്ചും ചിന്തിക്കാതിരിക്കാനും ക്രിക്കറ്റിൽ ശ്രദ്ധ കേന്ദ്രീകരിക്കാൻ എന്റെ മാതാപിതാക്കൾ എന്നോട് ആവശ്യപ്പെട്ടു. ഡെറാഡൂണിലെ അക്കാദമിയില്‍ പരിശീലനം പുനരാരംഭിച്ച ഞാന്‍ ഏറെ വിയര്‍പ്പൊഴുക്കി.”- ശമി പറഞ്ഞു.

2018 മാർച്ചിൽ ഷമിയുടെ ഭാര്യ ഹസിൻ ജഹാൻ ഗാർഹിക പീഡന ആരോപണം ഉന്നയിച്ച് പോലീസിൽ പരാതി നൽകിയിരുന്നു. തുടർന്ന് ഷമിയ്ക്കെതിരെയും സഹോദരനെയും പോലീസ് കേസെടുത്തിരുന്നു.

ഷമിയുടെ വ്യക്തിപരമായ ജീവിതത്തിലെ പ്രശ്നങ്ങള്‍ കളിക്കാരനുയുള്ള പ്രധാന കരാറുകള്‍ നിർത്തിവയ്ക്കാൻ തൊഴിലുടമയായ ബി.സി.സി.ഐയെ നിർബന്ധിതമാക്കിയിരുന്നു.

“എല്ലാ ദിവസവും ഒരേ വ്യായാമങ്ങൾ ആവർത്തിക്കുന്നതിനാൽ പൂര്‍വസ്ഥിതിയില്‍ എത്തുന്നത് പ്രയാസകരംയിരുന്നു.തുടർന്ന് കുടുംബപ്രശ്നങ്ങൾ ആരംഭിക്കുകയും എനിക്കും ഒരു അപകടം സംഭവിക്കുകയും ചെയ്തു.ഐ‌പി‌എല്ലിന് 10-12 ദിവസം മുമ്പാണ് അപകടം സംഭവിച്ചത്, എന്റെ വ്യക്തിപരമായ പ്രശ്നങ്ങൾ മാധ്യമങ്ങളിൽ ഉയർന്നുവരുന്നു, ”ഷമി രോഹിത്തിനോട് പറഞ്ഞു .

കുടുംബം അദ്ദേഹത്തോടൊപ്പം ഒരു പാറപോലെ നിന്നുവെന്നും അതാണ് തന്നെ തിരിച്ചെത്താന്‍ സഹായിച്ചതെന്നും ഷമി പറഞ്ഞു.

2015 ലോകകപ്പിൽ തനിക്കേറ്റ പരിക്ക് പൂർണ്ണമായി സുഖം പ്രാപിക്കാൻ 18 മാസമെടുത്തുവെന്നും അതാണ് തന്റെ ജീവിതത്തിലെ ഏറ്റവും വേദനാജനകമായ നിമിഷമെന്നും ഷമി പറഞ്ഞു.