പെഷവാർ • പാക്കിസ്ഥാന്റെ വടക്കുപടിഞ്ഞാറൻ ഖൈബർ-പഖ്തുൻഖ്വ പ്രവിശ്യയിലെ ഗാന്ധാര നാഗരിക കാലഘട്ടത്തിലെ 1,700 വർഷം പഴക്കമുണ്ടെന്ന് കരുതുന്ന അപൂര്‍വ ബുദ്ധപ്രതിമ നിര്‍മ്മാണതൊഴിലാളികള്‍ കൂടം ഉപയോഗിച്ച് തകര്‍ത്തു.
മർദാൻ ജില്ലയിലെ തഖ്ത് ഭായി താലൂക്കില്‍ കാർഷിക ഫാമിൽ നടത്തിയ ഖനനത്തിനിടെ കണ്ടെത്തിയ പ്രതിമ നശിപ്പിച്ചതിന് നാല് പേരെ ശനിയാഴ്ച അറസ്റ്റ് ചെയ്തു. പ്രാദേശിക മൗലവിയുടെ നിര്‍ദ്ദേശ പ്രകാരമാണ് ഇവര്‍ പ്രതിമ തകര്‍ത്തതെന്നാണ് സൂചന.
ഒരാൾ പ്രതിമ തകര്‍ക്കുന്ന വീഡിയോ സോഷ്യൽ മീഡിയയിൽ വൈറലായതിനെ തുടർന്നാണ് അറസ്റ്റ്.
തകർന്ന പ്രതിമയുടെ പുരാവസ്തുക്കളുടെ മൂല്യം വിലയിരുത്തുന്നതിനായി അവയുടെ അവശിഷ്ടങ്ങള്‍ ശേഖരിച്ചതായി പുരാവസ്തു ഗവേഷണ മ്യൂസിയം ഡയറക്ടർ ഖൈബർ-പഖ്തുൻഖ്വ അബ്ദുസ് സമദ് ഖാൻ പറഞ്ഞു.
പ്രതിമ ഗാന്ധാര നാഗരികതയുടേതാണെന്നും ഏകദേശം 1,700 വർഷം പഴക്കമുണ്ടെന്നും ഡയറക്ടര്‍ പറഞ്ഞു. പോലീസ് പ്രദേശം വളഞ്ഞതായി ഡോൺ പത്രം റിപ്പോർട്ട് ചെയ്തു.
പ്രതിമ നശിപ്പിച്ചത് കുറ്റകരമാണെന്ന് പറഞ്ഞ സമദ് ഏതെങ്കിലും മതത്തെ അവഹേളിക്കുന്നത് അസഹനീയമാണ് എന്നും കൂട്ടിച്ചേര്‍ത്തു.
പ്രതികളെ പെട്ടെന്ന് അറസ്റ്റ് ചെയ്ത പോലീസ് നടപടിയെ അദ്ദേഹം അഭിനന്ദിച്ചു.
ആയിരം വർഷങ്ങൾക്ക് മുമ്പ് ആധുനിക പാകിസ്ഥാനിലും അഫ്ഗാനിസ്ഥാനിലും വ്യാപിച്ചുകിടക്കുന്ന ബുദ്ധിസ്റ്റ് ഗാന്ധാര രാജ്യത്തിന്റെ ഭാഗമായിരുന്നു തഖ്ത് ഭായ്. ശ്രീലങ്ക, കൊറിയ, ജപ്പാൻ എന്നിവിടങ്ങളിൽ നിന്നുള്ളവരുടെ വിനോദ സഞ്ചാര കേന്ദ്രമാണിത്. ഗാന്ധാര നാഗരികതയുടെ ഭാഗമായതിനാൽ ഇത് ഉപഭൂഖണ്ഡത്തിന്റെ ചരിത്രത്തിൽ രേഖപ്പെടുത്തിയിട്ടുള്ള ആദ്യകാല നഗരവാസങ്ങളിൽ ഒന്നാണ്.
ഖൈബർ പഖ്തുൻഖ്‌വയുടെ പഴയ പേരാണ് ഗന്ധാര, ബുദ്ധമതത്തിന്റെ അനുയായികൾക്ക് ഏറെ ആദരണീയമായ സ്ഥലമാണ് ഈ പ്രദേശം.
2017 ൽ ഹരിപുട്ട് ജില്ലയിലെ ഭാമലയിലെ ഒരു പുരാവസ്തു സ്ഥലത്ത് നിന്ന് അപൂർവവും പുരാതനവുമായ രണ്ട് ബുദ്ധ പ്രതിമകൾ കണ്ടെത്തിയിരുന്നു. ഈ സ്ഥലത്ത് കണ്ടെത്തിയതിൽ വച്ച് ഏറ്റവും വലിയ പ്രതിമ ബുദ്ധന്റെ മരണത്തെ ചിത്രീകരിക്കുന്നു. രണ്ടാമത്തെ പ്രതിമ ഇരട്ട പ്രഭാവമുള്ള ബുദ്ധനായിരുന്നു.
ലോകത്തിലെ ഏറ്റവും പഴക്കം ചെന്നതാണ് മരണത്തെ ചിത്രീകരിക്കുന്ന പ്രതിമ. അമേരിക്കൻ ലബോറട്ടറിയും ഇത് പരിശോധിച്ചുറപ്പിച്ചു. ഇത് ബി.സി മൂന്നാം നൂറ്റാണ്ടിനേക്കാൾ പഴയതാണെന്ന് തിരിച്ചറിഞ്ഞു.
ബുദ്ധന്റെ ലോകത്തിലെ ഏറ്റവും വലിയ വാസ്തുവിദ്യാ ശേഖരം പ്രദർശിപ്പിക്കുന്നതിന്റെ പേരിലും പെഷവാർ മ്യൂസിയം അറിയപ്പെടുന്നു.
Post Your Comments