Latest NewsNewsDevotionalSpirituality

ജീവിതത്തിൽ വിജയം നേടാനും, സമൃദ്ധിക്കുമായി ഹനുമാനെ പ്രാർത്ഥിക്കാം : വിവിധ വഴിപാടുകള്‍

ജീവിതത്തിൽ പ്രശ്നങ്ങളുണ്ടാകുമ്പോള്‍ ഹനുമാന് യഥാവിധി വഴിപാട് നടത്തി പ്രാര്‍ത്ഥിച്ചാൽ അനുകൂല ഫലങ്ങള്‍ ഉണ്ടാകുമെന്നാണ് വിശ്വാസം. ഹൈന്ദവ വിശ്വാസ പ്രകാരം ധീരത, ശക്തി തുടങ്ങിയവയുടെ പ്രതീകമാണ് ഹനുമാൻ. നിത്യവും ഹനുമാനെ സ്തുതിച്ചാൽ ദുഷ്ടശക്തികള്‍ അകന്നുപോകുമെന്ന് രാമായണത്തിൽ പ്രതിപാദിക്കുന്നു. നമ്മുടെ ഏറ്റവും മോശം കാലഘട്ടം എന്ന് വിശേഷിപ്പിക്കുന്ന ഏഴരശനി, കണ്ടകശനി എന്നീ സമയങ്ങളിൽ ഹനുമാനെ പ്രാര്‍ത്ഥിച്ചാൽ ബുദ്ധിമുട്ടുകള്‍ അകലുമെന്നാണ് കരുതപ്പെടുന്നത്.

പൊതുവേ മറ്റ് ദേവതകളെക്കാൾ വ്യത്യസ്തമാണ് ഹനുമാൻ്റെ വഴിപാടുകള്‍. വെറ്റിലമാല, വടമാല, സിന്ദൂരക്കാപ്പ്, വെണ്ണക്കാപ്പ്, തുളസിമാല എന്നിവ വഴിപാടായി സമര്‍പ്പിക്കുന്നത് വളരെ ഉത്തമമായ കാര്യമാണ്. വെറ്റിലമാല വഴിപാട് നൽകി പ്രാര്‍ത്ഥിച്ചാൽ സമൃദ്ധി ഉണ്ടാകുമെന്നും വിവാഹതടസ്സങ്ങൾ മാറുമെന്നുമാണ് വിശ്വാസം. വടമാല വഴിപാട് ആയുരാരോഗ്യത്തിനും സിന്ദൂരക്കാപ്പ് മനസ്സന്തോഷത്തിനും സമാധാനത്തിനും വെണ്ണക്കാപ്പ് കാര്യവിജയത്തിനും നല്ലതെന്നുമാണ് കരുതപ്പെടുന്നത്. തുളസിമാല സമര്‍പ്പണത്തിലൂടെ തീരാവ്യാധികൾ അകലുമെന്നുമാണ് വിശ്വാസം. ശ്രീരാമജയം എന്ന് കടലാസിൽ എഴുതി ഹനുമാൻ്റെ കഴുത്തിൽ അണിയിച്ച് പ്രാര്‍ത്ഥിച്ചാൽ സര്‍വ്വകാര്യവിജയം ഉണ്ടാകും.

ഹനുമാൻ ക്ഷേത്രത്തിന് വലം വെച്ചു പ്രാര്‍ത്ഥിച്ചാൽ ശത്രുദോഷം നീങ്ങുമെന്നുമാണ് പറയുന്നത്. എല്ലാ ദിവസവും ഉറങ്ങുന്നതിന് മുൻപ് ഹനുമൽ സ്തുതി ചൊല്ലിയാൽ ദുസ്വപ്നങ്ങള്‍ നിന്ന് മുക്തി ഉണ്ടാകും. ഹനുമാൻ്റെ ജന്മനക്ഷത്രമായ മൂലം നാളിൽ പ്രാര്‍ത്ഥന നടത്തുന്നത് സര്‍വ്വദോഷങ്ങള്‍ക്ക് പരിഹാരം ഉണ്ടാകും. ചൊവ്വ, വ്യാഴം, ശനി എന്നിവ ഹനുമാന് പ്രധാന്യമുള്ള ദിനങ്ങളാണ്.

ഹനുമൽ സ്തുതി

‘ മനോജവം മാരുതതുല്യവേഗം
ജിതേന്ദ്രിയം ബുദ്ധിമതാംവരിഷ്ഠം

വാതാത്മജം വാനരയൂഥമുഖ്യം
ശ്രീരാമദൂതം മനസാ സ്മരാമി
ബുദ്ധിർ ബലം യശോധൈര്യം
നിർഭയത്വമരോഗത
അജയ്യം വാക് പടുത്വം ച
ഹനൂമത് സ്മരണാത് ഭവേത്’

നമ്മുടെ ആഗ്രഹങ്ങള്‍ സാക്ഷാത്കരിക്കാൻ ഹനുമാനെ സ്തുതിക്കുന്നത് ഉത്തമമാണ്. കഠിനമായി പരിശ്രമിച്ചിട്ട് ഉദ്യോഗം ലഭിക്കാതിരിക്കുന്നവരും ഉദ്യോഗത്തിൽ നിരന്തരം പ്രശ്നങ്ങള്‍ നേരിടുന്നവരും ഹനുമാനെ സ്തുതിക്കുന്നത് ഉത്തമമാണ്. ഇത്തരത്തിലുള്ള ആവശ്യങ്ങള്‍ വേഗത്തിൽ നടപ്പാക്കിത്തരുമെന്നാണ് വിശ്വാസം.

” ഓം ശ്രീ വജ്രദേഹായ രാമഭക്തായ വായുപുത്രായ നമോസ്തുതേ”

ഈ മന്ത്രം ഹനുമാൻ ക്ഷേത്രത്തിൽ ദര്‍ശനം നടത്തുമ്പോള്‍ ജപിക്കുന്നത് തൊഴിൽ തടസം നീക്കും.

ഈസ്റ്റ് കോസ്റ്റ് ഡെയ്‌ലി വാർത്തകൾ ടെലഗ്രാമിൽ ലഭിക്കാൻ ഇവിടെ ക്ലിക്ക് ചെയ്യുക

Related Articles

Post Your Comments


Back to top button