ഗ്യാസ് ഏജന്‍സികളുടെ ഡെലിവറി വാഹനങ്ങളില്‍ നിന്ന് എല്‍പിജി സിലിണ്ടറുകള്‍ മോഷ്ടിച്ച രണ്ട് മയക്കുമരുന്നടിമകളെ പോലീസ് അറസ്റ്റ് ചെയ്തു. ഇവരില്‍ നിന്ന് മോഷ്ടിച്ച നാല് ഗ്യാസ് സിലിണ്ടറുകളും സ്‌കൂട്ടറും കണ്ടെടുത്തു. ഷാഹി മൊഹല്ലയിലെ സൗരവ് കുമാര്‍ (20), പ്രീതം നഗറിലെ പ്രേം വര്‍മ്മ (27) എന്നിവരെയാണ് പൊലീസ് അറസ്റ്റ് ചെയ്തത്.
സെപ്റ്റംബര്‍ 10 ന് സിലിണ്ടര്‍ മോഷണത്തെക്കുറിച്ച് പരാതി ലഭിച്ചതായി ഡിവിഷന്‍ നമ്പര്‍ 8 പോലീസ് പോസ്റ്റിലെ ചുമതലയുള്ള സബ് ഇന്‍സ്‌പെക്ടര്‍ രാജീന്ദര്‍ സിംഗ് പറഞ്ഞു. ഗ്യാസ് ഏജന്‍സിയില്‍ ജോലി ചെയ്യുന്ന ന്യൂ കൈലാഷ് നഗറിലെ മനോജ് കുമാര്‍ തന്റെ ഡെലിവറി വാഹനം ഉപകര്‍ നഗറിലെ പഹ്വ ധര്‍മശാലയ്ക്ക് സമീപം നിര്‍ത്തിയിട്ട് ഒരു എല്‍പിജി സിലിണ്ടര്‍ തെരുവിലേക്ക് കൊണ്ടു കൊടുത്ത് പോയി തിരിച്ചെത്തിയപ്പോള്‍ ഒരു സിലിണ്ടര്‍ കാണാനില്ലെന്ന് പരാതിക്കാരന്‍ വ്യക്തമാക്കിയിരുന്നു.
പരാതി ലഭിച്ചതിനെത്തുടര്‍ന്ന് പോലീസ് ഉടന്‍ തന്നെ അന്വേഷണം ആരംഭിച്ചു. സൂചന ലഭിച്ചതിനെത്തുടര്‍ന്ന് ശനിയാഴ്ച ഉപകര്‍ നഗറില്‍ നിന്ന് പ്രതിയെ അറസ്റ്റ് ചെയ്തു. പ്രതികള്‍ മയക്കുമരുന്നിന് അടിമകളാണെന്നും സിലിണ്ടറുകള്‍ മോഷ്ടിച്ച് അത് ശ്വസിച്ച് ലഹരി കണ്ടെത്തുകയുമായിരുന്നു എന്നും സബ് ഇന്‍സ്‌പെക്ടര്‍ പറഞ്ഞു.
ചോദ്യം ചെയ്യലില്‍, ഇത്തരത്തിലുള്ള നാല് സംഭവങ്ങളില്‍ പങ്കുണ്ടെന്ന് അവര്‍ സമ്മതിച്ചു, തുടര്‍ന്ന് നാല് ഗ്യാസ് സിലിണ്ടറുകള്‍ അവരുടെ പക്കല്‍ നിന്ന് കണ്ടെടുത്തു. ഇന്ത്യന്‍ പീനല്‍ കോഡിലെ സെക്ഷന്‍ 379, 34, 411 എന്നിവ പ്രകാരം ഇവര്‍ക്കെതിരെ കേസെടുത്തു. പ്രതികളെ ഞായറാഴ്ച കോടതിയില്‍ ഹാജരാക്കി ഏകദിന പോലീസ് കസ്റ്റഡിയില്‍ വിട്ടു.
Post Your Comments