കൊല്ലം: എ.ടി.എം കവര്‍ച്ച ചെയ്യാന്‍ ശ്രമിച്ചതിനെ തുടർന്ന് ബിരുദവിദ്യാര്‍ഥിയെ പോലീസ് അറസ്റ്റ് ചെയ്തു. കരിക്കോട് സ്റ്റേറ്റ് ബാങ്ക് ഓഫ് ഇന്ത്യയുടെ എ.ടി.എം കവര്‍ച്ച ചെയ്യാന്‍ ശ്രമിച്ചതിനാണ് കൊല്ലം നല്ലില സ്വദേശി ആദര്‍ശിനെ (20) പോലീസ് അറസ്റ്റ് ചെയ്തത്. മൂന്ന് ദിവസമായി പ്രതിയും കൂട്ടാളികളും ചേര്‍ന്ന് പകലും രാത്രിയും കുണ്ടറമുതല്‍ കൊല്ലം വരെയുള്ള എ.ടി.എമ്മുകള്‍ നിരീക്ഷണം നടത്തിയശേഷമാണ് 21ന് രാത്രി പതിനൊന്നോടെ കരിക്കോട് ജങ്ഷനിലെ എ.ടി.എം കവര്‍ച്ച ചെയ്യാന്‍ ശ്രമിച്ചത്.
21ന് രാത്രി മുക്കടവഴി കരിക്കോട് എത്തിയ പ്രതികള്‍ ജങ്ഷനില്‍ ആളൊഴിയുന്നതുവരെ കാത്തിരുന്നു. തുടര്‍ന്ന് ഹെല്‍മറ്റും കൂളിങ് ഗ്ലാസും റെയിന്‍കോട്ടും ധരിച്ച്‌ എ.ടി.എമ്മിന് മുന്നിലുള്ള കാമറ നശിപ്പിച്ചു. ഒരാള്‍ അകത്തുകടന്ന് പത പോലുള്ള വസ്തു സ്‌പ്രേ ചെയ്ത് കാമറ മറച്ചതിനുശേഷം കമ്പിപ്പാരയും ചുറ്റികയും ഉപയോഗിച്ച്‌ എ.ടി.എമ്മിന്‍റ മുന്‍വശം തകര്‍ത്തു. ലോക്കര്‍ തകര്‍ക്കാനുള്ള ശ്രമം വിജയിച്ചില്ല. ആ സമയം അവിടേക്ക് വന്ന കാര്‍ കണ്ട് പ്രതികള്‍ പള്‍സര്‍ ബൈക്കില്‍ രക്ഷപ്പെട്ടു. തുടര്‍ന്ന് കുണ്ടറ കൊല്ലം റൂട്ടിലെ സി.സി.ടി.വി കാമറകളിലെ ദൃശ്യങ്ങളില്‍നിന്ന് സംശയം തോന്നിയ ഇരുപതോളം പേരുടെ ഫോണ്‍ കോൾ വിശദാംശങ്ങള്‍ കേന്ദ്രീകരിച്ച്‌ നടത്തിയ അന്വേഷണത്തിനൊടുവില്‍ നല്ലിലയിലെ വീട്ടില്‍നിന്ന് പ്രതിയെ പിടികൂടുകയായിരുന്നു.
Read Also: ഇന്ന് ലോക ഹൃദയ ദിനം; ഹൃദ്രോഗങ്ങളിൽ നിന്ന് നമുക്ക് മുക്തി നേടാം
കേസില്‍ ഉള്‍പ്പെട്ട മറ്റ് പ്രതികളെ സംബന്ധിച്ച്‌ ലഭിച്ച സൂചനകളുടെ അടിസ്ഥാനത്തില്‍ തുടരന്വേഷണം നടക്കുന്നു. കണ്ണനല്ലൂര്‍ ഇന്‍സ്പെക്ടര്‍ യു.പി. വിപിന്‍കുമാര്‍, കിളികൊല്ലൂര്‍ ഇന്‍സ്പെക്ടര്‍ അനില്‍കുമാര്‍, എസ്.ഐ അരുണ്‍ഷാ, സ്പെഷല്‍ ബ്രാഞ്ച് എസ്.ഐ ആര്‍. ജയകുമാര്‍, ഡാന്‍സാഫ് ടീം അംഗങ്ങളായ എ.എസ്.ഐ ബൈജു പി. ജെറോം, സീനിയര്‍ സി.പി.ഒമാരായ കെ. സീനു, ജി. മനു, എസ്. സാജു, സി.പി.ഒമാരായ ആര്‍. രിപു, രതീഷ്, സിജോ കൊച്ചുമ്മന്‍ എന്നിവരുടെ നേതിർത്വത്തിലാണ് പ്രതിയെ പിടികൂടിയത്.
Post Your Comments