കുശിനഗര്‍: കോണ്‍ഗ്രസ് രാജ്യത്തെ ഭീകരവാദത്തിന്റെ മാതാവാണെന്നും ശ്രീരാമനില്‍ ജനങ്ങളുടെ വിശ്വാസത്തെ അപമാനിക്കുന്നുവെന്നും ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് ആരോപിച്ചു. രാജ്യത്തെ വേദനിപ്പിക്കുന്ന ആളുകളെ സഹിക്കേണ്ടതില്ല. ഈ രാജ്യം ആദ്യം ബ്രിട്ടീഷുകാരും പിന്നീട് കോണ്‍ഗ്രസും കൊള്ളയടിച്ചു. നെഹ്‌റു രാമനില്‍ വിശ്വസിച്ചില്ല. ഇന്ദിരാജി സന്യാസിമാര്‍ക്ക് നേരെ വെടിയുതിര്‍ത്തു. രാമന്റെ അസ്തിത്വം സോണിയ ജി നിഷേധിച്ചു എന്നും മുഖ്യമന്ത്രി പറഞ്ഞു.
രോഗം, തൊഴിലില്ലായ്മ, മാഫിയ രാജ്, അഴിമതി എന്നിവയ്ക്ക് പുറമേ, കോണ്‍ഗ്രസ്, എസ്.പി, ബി.എസ്.പി സര്‍ക്കാരുകള്‍ സംസ്ഥാനത്തിന് എന്ത് നല്‍കി? പ്രധാനമന്ത്രി മോദിയുടെ നേതൃത്വത്തില്‍ പ്രീണന രാഷ്ട്രീയത്തിന് സ്ഥാനമില്ലെന്നും യോഗി പറഞ്ഞു. പ്രീണന രാഷ്ട്രീയത്തിന്റെയും അഴിമതിയുടെയും പേരില്‍ പ്രതിപക്ഷ പാര്‍ട്ടികളെ ആക്ഷേപിച്ച മുഖ്യമന്ത്രി, രാമന്റെ ഭക്തര്‍ക്ക് നേരെ വെടിയുതിര്‍ത്ത ‘താലിബാന്‍ അനുകൂല, ജാതി, രാജവംശ മാനസികാവസ്ഥ’ സംസ്ഥാനത്തെ ജനങ്ങള്‍ സഹിക്കില്ലെന്നും പ്രതികരിച്ചു.
ഓര്‍ക്കുക! തേള്‍ എവിടെയുണ്ടെങ്കിലും അത് കടിക്കും. മോദിജി രാജ്യത്ത് മുത്തലാഖ് നിര്‍ത്തലാക്കി, പക്ഷേ ചില സമാജ്‌വാദി പാര്‍ട്ടി നേതാക്കളുടെ പ്രസ്താവന നിങ്ങള്‍ വായിച്ചിരിക്കണം. അവര്‍ താലിബാന്റെ പ്രവര്‍ത്തനങ്ങളെ പിന്തുണച്ചിട്ടുണ്ട്. പാകിസ്ഥാന്‍ അനുകൂല ഭീകരര്‍ ഇന്ന് രാജ്യത്ത് എവിടെയും ഒളിത്താവളം കണ്ടെത്തുന്നില്ല. 2012ല്‍ എസ്.പി സര്‍ക്കാര്‍ ഭീകരരുടെ കേസുകള്‍ പിന്‍വലിക്കാന്‍ തുടങ്ങിയതായും യോഗി ആരോപിച്ചു.കോണ്‍ഗ്രസ് രോഗങ്ങള്‍ നല്‍കുന്നു, രാമ വിശ്വാസത്തെ അപമാനിക്കുന്നു, മാഫിയകള്‍ക്ക് അഭയം നല്‍കുന്നു.
എന്നാല്‍ ബി.ജെ.പി പൗരന്മാരെ സുഖപ്പെടുത്തുന്നു, ശ്രീരാമന്റെ ഒരു മഹാക്ഷേത്രത്തിന്റെ നിര്‍മ്മാണത്തിന് വഴിയൊരുക്കുകയും മാഫിയയെ അവര്‍ അര്‍ഹിക്കുന്ന സ്ഥലത്തേക്ക് അയക്കുകയും ചെയ്യുന്നു. ബി.ജെ.പി ഉണ്ടെങ്കില്‍ എല്ലാവരോടും ബഹുമാനമുണ്ട്, വിശ്വാസത്തോട് ആദരവുണ്ട് എന്നും മുഖ്യമന്ത്രി പറഞ്ഞു. കുശിനഗറില്‍ നിരവധി വികസന പദ്ധതികള്‍ ആരംഭിക്കുന്നതുമായി ബന്ധപ്പെട്ട ചടങ്ങിനെ അഭിസംബോധന ചെയ്ത് സംസാരിക്കുകയായിരുന്നു യോഗി.
Post Your Comments