അടിമാലി: മകന്‍റെ ആസിഡ് ആക്രമണത്തില്‍ ഗുരുതര പൊള്ളലേറ്റ് ചികിത്സയിലിരുന്ന വയോധികന്‍ മരിച്ചു. വാളറ പഴമ്പിള്ളിച്ചാല്‍ പടിയറ വീട്ടില്‍ ചന്ദ്രസേനനാണ് (60) മരിച്ചത്. തിങ്കളാഴ്ച പുലര്‍ച്ച കോട്ടയം മെഡിക്കല്‍ കോളജ് ആശുപത്രിയില്‍ വച്ചാണ് മരണം സംഭവിച്ചത്.
മാർച്ച് 20-ന് ആണ് സംഭവം. രാത്രി വീട്ടില്‍ വെച്ച് മകന്‍ വിനീതാണ് (32) ചന്ദ്രസേനന്റെ ദേഹത്ത് ആസിഡ് ഒഴിച്ച് പരിക്കേൽപ്പിച്ചത്. 80 ശതമാനത്തിലേറെ പൊള്ളലേറ്റ ചന്ദ്രസേനനെ ആദ്യം അടിമാലി താലൂക്ക് ആശുപത്രിയിലും പിന്നീട് മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. മദ്യലഹരിയില്‍ എത്തിയ വിനീത് പിതാവുമായി സ്വത്ത് സംബന്ധിച്ച് വാക്ക് തർക്കത്തിൽ ഏർപ്പെടുകയും തുടര്‍ന്ന്, പ്രകോപിതനായി ആസിഡ് ഒഴിക്കുകയുമായിരുന്നു.
മുഖത്തും ശരീരത്തും പൊള്ളലേറ്റ നിലയിലാണ് ചന്ദ്രസേനനെ ആശുപത്രിയില്‍ എത്തിച്ചത്. അടിമാലി പൊലീസ് അറസ്റ്റ് ചെയ്ത വിനീത് ദേവികുളം സബ് ജയിലില്‍ റിമാൻഡിലാണ്. ചന്ദ്രസേനന്റെ ഭാര്യ: കനകവല്ലി. മകള്‍: ജ്യോതിഷ.
Post Your Comments