ഒന്നാം തീയതി അനധികൃത മദ്യവിൽപന : ബിവറേജ് ജീവനക്കാരൻ അറസ്റ്റിൽ

ആലപ്പുഴ: ബിവറേജ് ഷോപ്പിന് അവധിയായ ഒന്നാം തീയതി അനധികൃത മദ്യവിൽപന നടത്തിയ ബിവറേജ് ജീവനക്കാരൻ അറസ്റ്റിൽ. ബിവറേജ് ജീവനക്കാരൻ കുന്നപ്പള്ളി തച്ചം വീട്ടിൽ ഉദയകുമാർ (50) ആണ് അറസ്റ്റിലായത്. രഹസ്യ വിവരത്തെ തുടര്‍ന്ന്, എക്സൈസ് ഇൻസ്പക്ടർ എസ് സതീഷും സംഘവും ചേർന്ന് മണ്ണഞ്ചേരി കുന്നപ്പള്ളി ഭാഗത്ത് നടത്തിയ പരിശോധനയിലാണ് ഇയാൾ അറസ്റ്റിലായത്.

Read Also : വി​ല്ലേ​ജ് ഓ​ഫീ​സി​ൽ തി​രി​മ​റി ന​ട​ത്തി​യ ജീ​വ​ന​ക്കാ​രൻ പൊലീസ് പിടിയിൽ

മദ്യശാലകൾ അവധിയായതിനാൽ അമിത ലാഭത്തിൽ വിൽപനയ്ക്കായി സൂക്ഷിച്ച 22 കുപ്പി മദ്യം ഇയാളുടെ പക്കൽ നിന്നും കണ്ടെടുത്തു. ആലപ്പുഴ ബോട്ട് ജെട്ടിക്ക് സമീപമുള്ള കൺസ്യൂമർഫെഡ് മദ്യവിൽപനശാലയിലെ സെയിൽസ് അസ്സിസ്റ്റന്റാണ് ഉദയകുമാർ.

എക്സൈസ് സംഘത്തില്‍ പ്രിവന്റീവ് ഓഫീസർ പി ടി ഷാജി, കെ എസ് ലാൽജി, പ്രസന്നൻ, അനിലാൽ, ധനലക്ഷ്മി എന്നിവരും ഉണ്ടായിരുന്നു. പ്രതിയെ കോടതിയിൽ ഹാജരാക്കി റിമാന്റ് ചെയ്തു.