കൊല്ലത്ത് അഭിഭാഷകന് നേരെ സുഹൃത്ത് എയര്‍ ഗണ്‍ ഉപയോഗിച്ച് വെടിയുതിര്‍ത്തു 

കൊല്ലം: കൊട്ടാരക്കരയിൽ യുവ അഭിഭാഷകന് വെടിയേറ്റു. പുലമൺ സ്വദേശി മുകേഷി(34) നാണ് വെടിയേറ്റത്. ബുധനാഴ്ച രാത്രി 11 മണിയോടെയാണ് സംഭവം. അയൽക്കാർ തമ്മിലുള്ള സംഘർഷത്തെ തുടർന്നാണ് സംഭവം. വെടിയുതിർത്ത പ്രൈം അലക്‌സിനെ പോലീസ് കസ്റ്റഡിയിലെടുത്തു.

തോളെല്ലിൽ വെടിയേറ്റ അഭിഭാഷകൻ തിരുവനന്തപുരം മെഡിക്കൽ കോളേജിൽ ചികിത്സയിലാണ്. വെടിയുണ്ട പുറത്തെടുക്കാനുള്ള ശസ്ത്രക്രിയ ഇന്ന് നടക്കും. അയൽക്കാരനും അഭിഭാഷകന്റെ കുടുംബവും തമ്മിൽ മുൻപും പ്രശ്നമുണ്ടായിരുന്നു. വീട് കയറി മുകേഷിന്റെ മാതാപിതാക്കളെ മർദ്ദിച്ച സംഭവവും ഉണ്ടായിരുന്നു. ഏത് സാഹചര്യത്തിലാണ് അയൽവാസി തോക്കുമായി എത്തിയതെന്ന് വ്യക്തമല്ല.

ഇയാൾക്കൊപ്പം സംഭവസമയം മറ്റൊരാൾ കൂടിയുണ്ടായിരുന്നുവെന്നാണ് പോലീസ് പറയുന്നത്. ഇയാളെയും പോലീസ് കസ്റ്റഡിയിലെടുത്തു. ചോദ്യം ചെയ്ത ശേഷം പ്രതിയാക്കുന്ന കാര്യത്തിൽ തീരുമാനമെടുക്കും. നിലവിൽ അറസ്റ്റ് രേഖപ്പെടുത്തിയ അയൽവാസിക്കെതിരെ വധശ്രമത്തിനാണ് കേസെടുത്തിരിക്കുന്നത്.