സീരിയലിൽ അഭിനയിപ്പിക്കാമെന്ന് പറഞ്ഞ് ഫ്ലാറ്റിലെത്തിച്ച് ക്രൂര ലൈംഗിക പീഡനം: അവശയായ യുവതിയെ ആശുപത്രിക്കുമുന്നിൽ തള്ളി

കോഴിക്കോട്: സീരിയലിൽ അഭിനയിപ്പിക്കാമെന്ന് പറഞ്ഞു വിശ്വസിപ്പിച്ച് യുവതിയെ ലൈംഗികമായി പീഡിപ്പിച്ച കേസിൽ മലപ്പുറം ചെമ്മാട് സ്വദേശികളായ രണ്ടു പ്രതികൾക്കായി പോലീസ് അന്വേ‌ഷണം ആരംഭിച്ചു. അഭിനയവുമായി ബന്ധപ്പെട്ട കാര്യങ്ങൾ സംസാരിക്കാനെന്നുപറഞ്ഞാണ് പീഡനത്തിനിരയായ യുവതിയെയും കൂട്ടുകാരിയെയും ഫ്ളാറ്റിലെത്തിച്ചത്.

ഫ്ളാറ്റിൽ നേരത്തേ താമസമാക്കിയ വ്യക്തിയാണ് പ്രതികളിലൊരാൾ. ഇയാളുടെ സുഹൃത്താണ് രണ്ടാമൻ. കോട്ടയം സ്വദേശിയായ പരാതിക്കാരിയെ കണ്ണൂർ സ്വദേശിയായ കൂട്ടുകാരിയാണ് പ്രതികളുമായി പരിചയപ്പെടുത്തിയത്. നാലാംതീയതി കാരപ്പറമ്പിലുള്ള സ്വകാര്യ ഫ്ളാറ്റിൽവെച്ചായിരുന്നു പീഡനം. എന്നാൽ, തന്നെയും പീഡിപ്പിക്കാൻ ശ്രമമുണ്ടായെന്നാണ് കണ്ണൂർ സ്വദേശിയായ യുവതി പോലീസിനോടു പറഞ്ഞത്. കുളിമുറിയിൽ ഓടിക്കയറി വാതിലടച്ചതിനാൽ താൻ രക്ഷപ്പെടുകയായിരുന്നെന്നാണ് ഇവർ നൽകിയ മൊഴി.

യുവതികൾ താമസിക്കുന്ന ഹോസ്റ്റലിൽനിന്ന് ഉച്ചയ്ക്ക് 1.30-ഓടെ പ്രതികൾ ഇരുവരെയും കാറിൽ ഫ്ളാറ്റിലെത്തിക്കുകയായിരുന്നു. ക്രൂര പീഡനത്തിനൊടുവിൽ അവശയായ യുവതിയെ വൈകീട്ട് 3.30-ന് അരയിടത്തുപാലം സ്വകാര്യ ആശുപത്രിക്കുമുന്നിൽ ഇറക്കിവിട്ടു. പിന്നീട് പ്രതികൾ കാറിൽ കടന്നുകളഞ്ഞു.

കണ്ണൂരിൽ ആർമി ഓഫീസറുടെ വീട്ടിൽ ജോലിചെയ്തുവരുകയായിരുന്നു പരാതിക്കാരി. അവിടെനിന്നാണ് കണ്ണൂർ സ്വദേശിയായ യുവതിയെ പരിചയപ്പെട്ടത്. ഈ യുവതി ആറുമാസമായി കോഴിക്കോട്ട് അഭിനയത്തിനുള്ള അവസരം തേടി താമസിക്കുകയായിരുന്നു. പോലീസിൽ പരാതി നൽകാതിരുന്നാൽ അഞ്ചുലക്ഷംരൂപ തരാമെന്ന് പ്രതികൾ യുവതികളോട് വാഗ്ദാനംചെയ്തിരുന്നതായും അന്വേഷണ ഉദ്യോഗസ്ഥർ പറഞ്ഞു.