ചെന്നൈ: പടക്ക നിർമാണശാലയ്ക്ക് തീപിടിച്ച് 9 പേർ വെന്തുമരിച്ചു. 19 പേർക്ക് പൊള്ളലേൽക്കുകയും ചെയ്തിട്ടുണ്ട്. തമിഴ്‌നാട് കാഞ്ചീപുരത്താണ് പടക്ക നിർമാണശാലയ്ക്ക് തീപിടിച്ചത്. നിർമാണശാലയ്ക്ക് പുറത്ത് ഉണക്കാൻ വച്ച പടക്കങ്ങളിൽ നിന്നാണ് തീപിടിച്ചത്.
പരിക്കേറ്റവരെ ചികിത്സയ്ക്കായി ആശുപത്രിയിൽ പ്രവേശിപ്പിച്ചിട്ടുണ്ട്. കാഞ്ചീപുരം ജില്ലയിലെ കുരുവിമലയിൽ പ്രവർത്തിക്കുന്ന നരേന്ദ്രൻ ഫയർവർക്ക് എന്ന ചെറുകിട നിർമ്മാണശാലയിലാണ് തീപിടുത്തം ഉണ്ടായത്.
5 കടമുറികളിലായാണ് പടക്ക നിർമാണ ശാല പ്രവർത്തിച്ചിരുന്നത്. സുരക്ഷാ മാനദണ്ഡങ്ങൾ പാലിക്കാത്തതിന് പടക്ക നിർമാണശാല ഉടമ നരേന്ദ്രകുമാറിനെ പൊലീസ് കസ്റ്റഡിയിലെടുത്തു. ഫയർഫോഴ്സ് സംഭവ സ്ഥലത്തെത്തി രക്ഷാപ്രവർത്തനം നടത്തുന്നുണ്ട്. സ്ഫോടനം നടക്കുന്ന സമയത്ത് 30 പേരെങ്കിലും പടക്ക ഫാക്ടറിയിൽ ജോലി ചെയ്തിരുന്നതായാണ് പുറത്തു വരുന്ന വിവരം.
Post Your Comments