അമ്മാതിരി കമന്റൊന്നും വേണ്ട, മിണ്ടാതിരിക്കൂ, അമേരിക്ക! പൗരത്വ ഭേദഗതി ഞങ്ങളുടെ ആഭ്യന്തര കാര്യം: വിമര്‍ശിച്ച് ഇന്ത്യ

ന്യൂഡൽഹി: സിഎഎ നിയമം നിലവിൽ വന്നതോടെ ഇന്ത്യയ്‌ക്കെതിരെ വിമർശനം ഉന്നയിച്ച അമേരിക്കയെ വിമർശിച്ച് മുതിർന്ന അഭിഭാഷകൻ ഹരീഷ് സാൽവെ. കരുണയില്ലാതെ കൊല്ലപ്പെടുന്ന പാവപ്പെട്ട പലസ്തീനികൾക്ക് അമേരിക്ക പൗരത്വം നൽകുമോ? ഇല്ലെങ്കിൽ, അവർ മിണ്ടാതിരിക്കട്ടെയെന്ന് ഹരീഷ് വിമർശിച്ചു. ഇന്ത്യയുടെ പൗരത്വ ഭേദഗതി നിയമത്തിൽ യുഎസ് ആശങ്ക പ്രകടിപ്പിച്ചതിന് പിന്നാലെയായിരുന്നു അദ്ദേഹത്തിന്റെ പ്രസ്താവന.

‘പാകിസ്ഥാനിലെ അഹമ്മദിയകൾക്കോ, മ്യാൻമറിലെ റോഹിങ്ക്യകൾക്കോ, ദയയില്ലാതെ കൊല്ലപ്പെടുന്ന പാവപ്പെട്ട പലസ്തീനികൾക്കോ ​​അമേരിക്ക തുറന്ന പൗരത്വം നൽകുമോ? ഇല്ലെങ്കിൽ ഞാൻ പറയും, അമേരിക്ക, മിണ്ടാതിരിക്കുക. ഇസ്ലാമിക രാഷ്ട്രമായി സ്വയം പ്രഖ്യാപിച്ച പാകിസ്ഥാനിൽ കാര്യങ്ങൾ മാറി. ബംഗ്ലാദേശും സ്വയം ഇസ്ലാമിക് റിപ്പബ്ലിക് എന്ന് വിളിക്കുന്നു. താലിബാനുമായുള്ള അഫ്ഗാനിസ്ഥാൻ്റെ ദൗർഭാഗ്യം ഞങ്ങൾക്കെല്ലാം അറിയാം’, സാൽവെ പറഞ്ഞു.

ഇസ്രയേലിനുള്ള പിന്തുണ പുനഃപരിശോധിക്കണമെന്നും മറ്റ് രാജ്യങ്ങൾക്ക് പ്രഭാഷണം നടത്തുന്നതിനുപകരം അതിൻ്റെ ആഭ്യന്തര വെല്ലുവിളികളെ അഭിമുഖീകരിക്കുന്നതിൽ ശ്രദ്ധ കേന്ദ്രീകരിക്കണമെന്നും അദ്ദേഹം അമേരിക്കയോട് അഭ്യർത്ഥിച്ചു.

അമേരിക്കയ്‌ക്കെതിരെ വിദേശകാര്യ മന്ത്രാലയ വക്താവ് വക്താവ് രണ്‍ധീര്‍ ജയ്സ്വാളും ശബ്ദമുയർത്തി. സിഎഎ ഇന്ത്യയുടെ ആഭ്യന്തര കാര്യമാണെന്നും അതില്‍ മറ്റു ഇടപെടലുകള്‍ക്ക് അനുവദിക്കില്ലെന്നും കേന്ദ്രം വ്യക്തമാക്കി. സിഎഎ നടപ്പാക്കാനാണ് രാജ്യം ഇരു സഭകളിലും നിയമം പാസാക്കിയെടുത്തത്. ഇതിനെക്കുറിച്ചുള്ള അമേരിക്കയുടെ പ്രസ്താവന തെറ്റായതും അനാവശ്യവുമാണെന്നും രണ്‍ധീര്‍ ജയ്സ്വാള്‍ പറഞ്ഞു. ഇന്ത്യയുടെ ബഹുസ്വര പാരമ്പര്യത്തെക്കുറിച്ചും മേഖലയുടെ വിഭജനപൂര്‍വ ചരിത്രത്തെക്കുറിച്ചും അറിവില്ലാതെയുള്ള പ്രതികരണങ്ങള്‍ ഒഴിവാക്കുന്നതാണ് നല്ലത്. ഇന്ത്യയുടെ സുഹൃദ് രാജ്യങ്ങള്‍ നടപടിയെ സ്വാഗതം ചെയ്യുകയാണ് വേണ്ടതെന്നും രണ്‍ധീര്‍ ജയ്സ്വാള്‍ പറഞ്ഞു.

അതേസമയം, സിഎഎ നടപ്പാക്കുന്നത് ഇന്ത്യയിലെ മതസ്വാതന്ത്ര്യത്തെ ബാധിക്കുമെന്ന ആശങ്ക പ്രകടിപ്പിച്ച് യുഎസ് സ്റ്റേറ്റ് ഡിപ്പാർട്ട്മെൻ്റ് ഈ ആഴ്ച പ്രസ്താവന പുറപ്പെടുവിച്ചിരുന്നു. 2019-ൽ ആദ്യം നിർദ്ദേശിച്ച പൗരത്വ ഭേദഗതി നിയമം രാജ്യവ്യാപകമായി പ്രതിഷേധങ്ങൾക്കും വിഭാഗീയ അക്രമങ്ങൾക്കും കാരണമായി. സിഎഎ മുസ്‌ലിംകളോട് വിവേചനം കാണിക്കുന്നുവെന്നും ദേശീയ ജനസംഖ്യാ രജിസ്റ്ററും (എൻപിആർ), ദേശീയ പൗരത്വ രജിസ്റ്ററുമായി (എൻആർസി) ന്യൂനപക്ഷ വിഭാഗങ്ങളെ ടാർഗെറ്റുചെയ്യാൻ ഉപയോഗിക്കുമെന്നും ചൂണ്ടിക്കാട്ടി വിമർശകർ എതിർപ്പുകൾ ഉന്നയിച്ചു. എന്നിരുന്നാലും, അത്തരം അവകാശവാദങ്ങളെല്ലാം സർക്കാർ നിരസിച്ചു.